官方透露出嚟嘅新功能，较受注目嘅有图像一揿褪地、锁定画面好似Apple Watch咁大玩个人化、更强大嘅专注模式、编辑甚至删除啱啱发出嘅iMessage等等，其实仲有好多官方冇乜提及，但又非常有用嘅功能㗎！就由小编介绍一啲好好用但少人讲嘅秘技俾大家，令你嘅iPhone好似私人秘书咁贴心。
(图片来源: 9to5mac)
第一个要介绍嘅秘技，其实已经曝晒光，但官方又真系一直冇讲过iOS 16会有呢个功能，佢就系随显萤幕（Always on Display，简称AOD）。最初系由用家叉电过后无意发现，又或者自己整一个黑色墙纸再校暗亮度扮系AOD。不过iOS 16推出beta 4后，有外媒喺内部文件发现全新随显桌布的动态影片，清楚显示iPhone 14进入待机状态后，iOS 16 解锁画面桌布会立即出现过场动画，进入AOD模式。当使用者放低手机，萤幕会变音，颜色亦变得单调，但当使用者拿起手机，萤幕会变番光亮，颜色亦回复正常，就好似Apple Watch果种效果。不过该段影片只见到iPhone画面得时间日期，希望苹果继续改良，到正式版推出有埋Widget小工具就更理想。亦有传AOD只限iPhone 14 Pro及iPhone 14 Pro Max用到，然后去到 iPhone 15甚至iPhone 16先开放全系列iPhone支援。
呢个系小编想要好耐嘅功能：喂Siri，帮我熄机！而家iPhone要熄机，就揿住左右边掣三秒，然后要扫一下萤幕，除咗要等，仲要你两只手都要得闲。iOS 16 beta 4就可以叫Siri帮你熄手机，又或者你用完Facetime，叫Siri帮手收线。虽然熄机前，你仲要确认一次系唔系要熄机（小编估计系防止使用者被人整蛊搅到熄咗机都唔知），但起码而家单手就做到，仲悭咗少少时间。而根据网上撷图显示，使用者想执行呢个功能，要先启动Siri然后再拣启动收线功能，如果你真系好惊被人玩，搅到成日意外熄机，咪唔好启动呢个功能。
(图片来源: SteveMoser@twitter)
而家喺iPhone用浏览器网上购物，如果你想用Apple Pay俾钱，就只能用苹果自家嘅Safari，iOS 16似乎就解除咗呢个限制。自从iOS 16嘅第二、三个测试版推出后，有网民发现另一款浏览器—Firefox，都用到Apple Pay俾钱，然后7月尾iOS 16推出第四个测试版本，又有网民测试到其余两款热门浏览器，即系Edge同Chrome都用到Apple Pay俾钱啦！有人就猜测Apple咁做，系为咗应付明年春季实施嘅欧盟数码市场法（一条限制大型科技企业对小型企业进行反竞争行为嘅法案），避免因此受到欧盟惩罚。如果Chrome用到Apple Pay，咁大家唔驶再喺Safari又bookmark番同一样嘅购物网店，都算系贴心嘅小改进。
讲起购物，大家扫完货之后，都好想知战利品运到去边、几时到埗等等，可能你要频频去购物网站或者快递app，睇吓送货进度如何，而iOS新增即时动态功能，等你唔驶开其他app，就咁系锁机画面都知道件货几时送到嚟。不过呢个功能可以做到乜，就视乎第三方app嘅开发人员想点做，所以日前苹果推出咗 ActivityKit 框架，俾开发人员可喺锁定萤幕上，按照应用程式嘅更新，同步进行实时跟踪，例如咖啡店可以「通知」你头先外卖落单嘅咖啡已经做好，放喺柜面等你拎、买衫买鞋网站可以话知你件货而家由东莞运紧落黎，预计等多三日到香港等等。
用另一部电脑控制第二部电脑就唔出奇，但你有冇试过用手机嚟控制电脑、甚至一部iPhone控制其他嘅iPhone？iOS 16 就喺辅助功能加入「控制周围设备」选项，俾你喺蓝芽接收到嘅距离内，控制另一部iPhone或者iPad。不过另一个装置都需要使用iOS 16 (或 iPadOS 16)，同埋登入相同嘅Apple ID 帐号，最后系iPad唔可以控制iPhone，只能用iPhone控制iPad。至於可以遥控做到乜，暂时系用iPhone打开另一个装置嘅主画面、App切换、通知中心、控制中心同埋启动Siri，至於可唔可以遥控开启另一部装置嘅档案，又或者用手机控制另一部装置执行某些功能(但可以执行及控制另一部装置嘅音乐播放)，就暂时未见做到，小编希望呢个功能可以更完善，例如可以用iPhone控制iPad然后做presentation，或者用iPad画完图后用iPhone开启俾其他人睇等等。
(图片来源: MacRumors)
假设你开铺头，装咗wifi方便员工上网，但你又唔想将wifi密码贴出嚟以免被街外人睇到，可以点做呢？又或者朋友上你屋企，想借用你的wifi，但你好耐都冇入过密码所以忘记咗，可以用咩方法去搵番个密码出嚟？iOS 16可以俾你用Face ID、Touch ID或者Passcode，睇番你曾经有连过线嘅wifi密码，然后俾你复制再分享俾其他人。方法系入咗wifi选项后，再喺密码长揿，手机就会出现你想用Face ID、Touch ID或者Passcode睇番wifi密码。用番铺头、朋友上屋企做例子，你可以用呢个方法将wifi密码透过whatsapp俾新员工或者朋友，咁咪唔惊被街外人知道wifi密码啦。
(图片来源: 9to5mac)
以前你影咗好多相，要逐张相去执，非常嘥时间，尤其好多相片编辑，都只系校光暗、或者令主体sharp啲、甚至用自动执相功能令张相好睇一点，你一定会谂：可唔可以用同一堆准则，一次过执好多嘅相？iOS 16就容许你咁做，方法系首先拣一张，然后点击右上角的Edit，编辑相片完后按Done。之后返去相薄，再选择右上角的三线icon，再选copy edit，然后你可以拣边啲相片要用同一套执相方法，拣完再选右下角的三画图示，然后拣Paste Edit，咁你头先所拣既所有相都会执靓晒！
如果你习惯将所有密码，都用iPhone嘅笔记储存，咁呢个iOS 16功能对你非常有用。因为你可以将每个notes都上锁，但又唔驶每个notes都要独立密码，然后用Face ID、Touch ID或者Passcode帮所有notes上锁。要解锁睇番notes肉容，就要透过Face ID、Touch ID或者Passcode，除非你自爆Passcode，否则其他人都几难睇到你上锁咗嘅笔记写乜东东。
(图片来源: Nintendo)
iPhone 14支援5G，又大有可能用A16晶片，加上萤幕显示又超靓，唔用嚟打手游实在浪费！如果你唔想笃手机萤幕笃到手痛，不如买任天堂嘅Switch Joy Con手掣，然后将佢哋同装咗iOS 16嘅iPhone连接，打机都舒服得多。当iOS 16初初推出测试版，已经有外国网友发现，iOS 16系支援任天堂Switch 嘅Joy Con，而且配对方法超简单，就咁用蓝笌就可以，手机仲识得帮你配对一只或者两只手掣，如果左右手掣都配对，仲可以变为一个大型控制器。根据台湾嘅游戏迷，佢哋话iPhone 用iOS 16连接Switch Joy Con手掣，表现拍得上连接switch主机，实在系打机迷嘅喜讯。
最后一个隐藏功能，可以话系新鲜滚热辣，因为系刚刚推出的iOS 16 beta 5先加入既新功能，喜欢撷图然后向其他朋友分享消息嘅你，一定会觉得呢个功能超好用！而家我哋喺FB或者手机推送，见到突发消息，通常都系萤幕撷图，然后再喺whatsapp或者FB贴图，跟住再share出去。虽然系方便，但缺点系相片簿会愈储愈多撷图。iOS 16 beta 5新增「复制和删除」功能，俾你撷图后按copy，将图片喺whatsapp或FB分享后，唔再留底喺相片库，咁你就唔驶再入去图片库将佢地逐个删除啦。
咁多种秘技，唔知你地又知道几多个呢？
Tech实你 IOS 苹果 秘技
