细菌滋生原因

手机萤幕滋生细菌嘅成因有好多，除咗喺平时空气中会有细菌之外，我哋成日都会将手机放枱面，边食饭边用手机等，呢啲行为都会令手机滋生大量细菌，加上手机的温度一般都系摄氏25-32℃，系细菌繁殖嘅最佳温度。

而最大嘅原因就系普遍都市人习惯去厕所嗰阵用手机，厕所每个角落充满细菌，亦系一个非常适合细菌生存嘅环境。加上我哋双手好容易会粘到唔同嘅细菌，所以当带住手机入厕所用嘅时候，手上、厕所嘅细菌就会粘附喺手机表面，令手机满布细菌。

手机表面嘅细菌大部分都系大肠杆菌、金黄色葡萄球菌等细菌同埋流感病毒，有研究发现手机萤幕含菌量比马桶座垫高3.5倍，而装上保护壳嘅手机含菌量就更加高，因为当手机装上保护壳，手机同壳之间嘅缝隙就会增多，咁样就更加藏污纳垢。

研究报告

有传媒分别由50部智能手机、手机外壳同埋马桶座表面采取样本进行对比检验，结果发现厕所板有220单位嘅细菌，手机胶壳平均有1,479单位，后者比前者高出近6倍。另外，手机使用皮套嘅情况就更严重，其污糟程度系厕所板嘅17倍。

此外，该报告亦同时抽样2000人进行调查，有4成受访者承认会喺厕所内用手机，不过得2成人话用完之后会清洁手机。专家警告，手机会变得咁污糟，好大原因就系因为用家将手机带入厕所所致。

消毒手机小技巧

1.唔好直接喷酒精

清洁剂同埋酒精虽然可以有效消毒手机，但千其唔好将清洁剂同埋酒精直接倒落或者喷落手机表面，特别系高浓度嘅清洁产品，因为清洁液可能会流入机身，导致手机损毁。正确嘅方法应该要先将清洁产品滴喺抹手机萤幕专用嘅布上，如果冇嘅话，眼镜布或一啲更软身嘅布都可以代替，要注意嘅系，清洁产品份量唔可以过多。

2.棉花棒抹缝隙

手机保护壳、SIM卡插槽、3.5mm耳机孔同埋充电位等细小嘅罅隙位置除咗容易积聚细菌同尘埃之外，都系细菌躲藏嘅好地方，大家喺消毒手机嘅时候，可以用棉花棒沾少少手机清洁剂，清理细小缝隙嘅尘埃。要留意清洁SIM卡插槽、3.5mm耳机孔同埋充电位呢啲位置尽量唔好用纯酒精，以免伤害手机内部。

3.避免过度擦拭

消毒手机唔系抹得愈多次愈乾净，喺消毒手机嘅时候千其唔好过度擦拭，将湿咗酒精嘅布喺手机表面擦拭几次，见到冇乜灰尘同油脂就可以，过度嘅擦拭可能会损害手机萤幕。