含金防雾涂层又薄又可屈曲

 

呢个发明由苏黎世联邦理工学院(简称ETH)嘅教授：Dimos Poulikakos和Thomas Schutzius领导，佢地嘅团队开发到一种可以将阳光转化为热量、超薄又透明嘅含有金粒子嘅防雾涂层，将佢贴喺眼镜、汽车挡风玻璃和其他表面，就可以永久防止镜面起雾。

 

传统嘅除雾剂含有「亲水分子」，令冷凝水均匀分布喺镜面，然后结成一层水薄膜而唔系水珠，令透过物体嘅光线唔会产生散射，咁镜片就唔会起雾。而ETH呢块含有金粒子嘅防雾涂层，原理系利用热量来对抗雾化。因为金嘅粒子会吸收阳光嘅红外线，令到涂层嘅温度比周围空气高摄氏8度，咁就可以阻止水分喺镜面凝结。另外佢只系吸咗红外线，冇理到其他可见光同紫外线，所以涂层仍然系透明。而金粒子就被两层超薄嘅二氧化钛夹住，防止金粒子流失，理论上系永远用到，唔会抹几抹就失去作用。虽然用到金，但用量极少，金层仅只有5奈米咁厚，每平方公尺材料就用到100毫克嘅金，假设一副眼镜系2×15平方公分，即系只需要0.3 毫克嘅金，成本价只系 0.017美元。

 

由於呢个含金嘅防雾涂层厚度只有10纳米、透光、可屈曲等，所以适用於其他透明物体，例如汽车玻璃、镜、光学传感器等，因为佢吸引红外线热力，所以间接好处系唔令汽车或单位喺夏天时变得更热。不过佢都有限制，就系需要足够嘅的光，才能产生加热效果。呢项研究已经喺《自然奈米技术》（Nature Nanotechnology）期刊发表，并希望尽快推出市场。

坊间智慧：玻璃防雾贴士

含有金粒子嘅防雾涂层仍未买到，咁除咗用防雾剂，仲有冇其他方法呢？如果系汽车，小编教你用两个方法令车挡玻璃唔会起雾。首先系打开空调但吹热风，咁玻璃热咗就自然冇雾气凝结，但坏处系耗油耗电。另一个方法系开对流窗，即系两边车窗都打开一条隙仔，令车内嘅空气对流，咁车入面空气温度接近外边温度，起到去雾的作用。但呢个方法喺落雨或者室外温度好冻就用唔到喇。

 

至於家居嘅玻璃同埋镜，又如何防止起雾呢？可以用番枧水、酒精或者盐水，用湿布浸一浸然后抹落去玻璃、镜嘅表面，再用乾布抺番走水份就可以。不过这方法，系要次次做，好鬼烦。

海外物业放盘睇呢度