自动辅助≠无人驾驶

 

今时今日嘅汽车加上AI智慧，确是系聪明得多。车厂亦很致力研发无人驾驶技术，根据SAE（美国汽车工程师学会）嘅分类，自动驾驶可以分为L0-L5级六个阶段。其中L0代表无自动辅助功能；L1-L2为驾驶辅助系统，主要由司机控制；L3-L4为有条件嘅自动驾驶系统；只有到咗L5先系真正无人驾驶。（详细解说请看附图）

 

咁即系话，除非级别去到L4或L5先唔需要司机接管驾驶，而家喺香港用紧嘅自动驾驶系统都只系去到L2，虽然技术上已可做到L3，但因为交通环境同道路设置有限制，所以唔可以真系用到L3。

自动驾驶帮到你

 

我哋先睇下一啲用家觉得自动驾驶点帮到手先：「平日开车，我剩系手握住軚盘，煞车和油门都唔使踩，系统会自动跟车，自动转弯，非常方便。有时会心神恍惚一下，偏离咗少少车道，又或者无留意前车突然煞车，系统都会立即修正或煞慢，同时又会发出警告。」

自动驾驶又会害死人

 

呢个系L2自动驾驶嘅好处，但如果你太信任佢就随时出事，最轰动嘅案例系2019年，一架Tesla Model 3喺Autopilot状态下以110km/h嘅时速直插入一架正横躺喺马路嘅白色货柜车，原因系当时系统分辨唔到白色车。

其实，我们喺好多网上短片，都睇过有啲司机又放开手又玩手机，有啲更离谱到食住饭盒开车。有时会令到司机混淆咗「辅助」驾驶同「自动」驾驶嘅概念，有啲人太信任自动辅助驾驶系统，以为开车时完全可以解放双手双脚。

 

更有啲车主喺网上分享咗自以为好聪明嘅做法，比如将矿泉水樽、或者一个橙绑喺軚盘上迷惑系统，等系统误认为系驾驶员嘅手放喺軚盘。甚至有车主上传一段自己使用辅助驾驶系统瞓住开理想ONE嘅视频，一度引发全网热议。

 

自动驾驶嘅发明源自咁样一个逻辑，人类揸车时会犯很多错误，而自动驾驶汽车犯错嘅概率相对於人类要细好多，会令驾驶变得更加安全。点解原本系为咗令人类驾驶更安全嘅系统，有可能成为马路杀手？呢个唔单单系一个技术问题，而系驾驶态度问题。

 

美国安全保险研究就喺2020年做过一项调查，有48％司机错误认为，只要开启 「Autopilot」功能，唔握住軚盘都系安全嘅。其实咁做就系错嘅。

连香港运输署都提醒司机：辅助方向引导和辅助转线功能只属辅助驾驶功能，而非自主驾驶系统，因此司机需要时刻保持百分百警觉，并需以双手控制车辆。

驾驶自动驾驶系统嘅正确态度

 

依照定义Level 2自动驾驶必须要符合：可以完全接管车辆，包含加速、煞车以及转向，但驾驶必须要全程监控并随时准备接手。咁点用L2驾驶自动系统先最安全好用？

 

1. 千万记住呢个唔系无人驾驶系统

2. 要时常注意路面状况

3. 系统可以帮助你舒缓一下专注驾驶而产生嘅疲劳，但唔好忽略系统发出嘅警号

4. 双手唔好离开軚盘

5. 虽然系统可以自己调整车速，但右脚最好唔好离开脚踏，预备有需要时立即踩到煞车

6. 调校行车车距时，也要紧记「2秒原则」，方法系计算前车经个一个路标（例如灯柱） 后嘅2秒，自己架车刚好经过。

7. 当感到疲劳（有啲系统可以监察到司机状况而发出疲劳驾驶警告），请停车休息一阵

8. 唔好将系统当系你嘅代驾，饮咗酒唔好揸车

9. 留意系统出错（例子：假如路上有一个胶袋吹来，程式可能会因为错误侦测为行人作出规避。）有时系统会误判而自动扭軚，请即时人手接管

10. 当你感觉前面有危险或跟车太贴，唔好等系统反应，主动减慢车速！