1. 手机程式透过AR睇球员即时数据

 

一般人睇波剩系关心比数，但Fans除咗输赢，仲想知爱队踢成点，边个球员最勤力、边个浪费晒入波机会，咁样先可以一路睇波一路同其他Fans讲波经嘛！呢啲数据要去专业嘅足球网站先搵到，仲随时要收钱，但而家用手机对住任何平面，就俾你睇晒落场球员嘅数据喇，超方便！

 

今届有得播世界盃嘅Now TV，整咗一个支援AR嘅手机程式「Now AR – FIFA 世界盃」，你只需开启程式之后拣赛事，再将手机镜头对住任何平面（例如墙身、枱面），手机个mon就会出现一个立体的球场，然后你点击球员，就睇到佢哋喺呢场波嘅数据，例如跑动速度、跑动距离、传球成功率等，亦可以宏观咁睇番两队嘅表现，例如战术调整、球队阵式，用户仲可以跟虚拟球员嚟一个合照。不过小编就试唔到呢个AR程式，一来佢只限睇到世界盃嘅Now客户使用，而且开波前「csl 5G Lens」应用程式才提供连结，俾用户下载及开启「Now AR – FIFA 世界盃」，到时先知道实际效果系点。

2. SAOT即时自动分析有冇越位

而家大型嘅足球联赛、重要盃赛都有VAR (影像辅助裁判)，帮手睇有冇手球、越位、入球前有冇球员犯规等等，虽然偶有争议但无可否认减低咗误判嘅机会。不过VAR系靠好多部球场入面摄影机，然后用唔同角度、慢镜头睇番球员做过乜，但对於球员有冇越位就未必睇得准，因为越位果条线究竟由边个角度去画，出黎嘅结果都好唔同。

 

为咗更加公平，其实今届欧联已经采用新技术去睇球员有冇越位，名为「半自动越位科技（semi-automated offside technology）」，卡塔尔世界盃都会用佢。根据国际足协，呢套系统嘅运作原理系咁嘅：用两个测量方法，第一个亦系最主要嘅，系透过放响球场天花嘅12部追踪摄影机，靠佢哋去检查放喺个波，同球员身上嘅29个侦测点，呢啲点就放喺球员有机会构成越位判决嘅部位。摄影机每秒收集50次数据，并计算个波同埋每个球员所在位置。第二个方法系个波里面有一个感应器，用嚟测量「惯性测量单元」（IMU），能有效感应非常唔明显嘅越位。呢个感应器每秒会传送500次数据到VAR室，用嚟精准地计出传球嘅一刻。将呢两个数据拍埋：即系知道球员位置、个波传咗未，人工智能就会计到某个传球有冇越位，仲会自动划埋越位条线以及罚球点，反应时间亦会由70秒减少到25 秒，之后VAR球证会检查一次，再将结果通知主裁判。由於划线系由同一个系统去划，令到判决更加公平，相信可以减低因为VAR判决嘅争拗。

3. 球场识得帮球迷同球员散热

 

今届世界盃主办国系卡塔尔，佢嘅11月平均气候介乎20至30℃，而小组赛开波时间系当地下午1点、4点、晚上7点同10点，如果要接近30℃睇波甚至踢波，都咪话唔辛苦啊！於是卡塔尔用嚟踢世界盃嘅球场，都系精心设计，当太阳喺卡塔尔天空移动，球场同看台仍能有相当大部分面积保持阴凉；其次系球馆主色用浅色，冇咁吸热，然后系外型，可以反射热力，并引导空气喺天井开口之上同周边流过。最后就系用冷气！吓？室外开冷气咪好嘥电？系唔会嘅，等小编用其中一个球场：Al Janoub Stadium做例子。

 

首先看台嘅座位下边，有一排通风口输出凉意，佢作用好似冲凉嘅花洒，不过唔系喷水而系喷空气，令观众感受到流动嘅气流，感觉就似有风不断吹过咁样。同埋佢吹出嚟嘅风系温和嘅，唔会好似室内冷气机咁样，对住你个头不断喷冷气，令观众好唔舒服。其次，球场内有大型喷嘴，向场内喷射冷空气，喺草坪上形成一个凉空气层，而唔系单纯咁将冷空气喷射入室内。呢个凉空气层离地唔超过两米，温度将介乎18至24℃。帮助开发呢个系统嘅空气调节专家表示，通风嘅角度，以及冷空气下沉嘅位置、方式，会令到球员感觉到凉风。当凉快嘅空气重新热起来之后，就会喺中层区域被抽气扇抽走，然后呢啲空气会被过滤，重新冷却，再被抽送回场内，完成循环。而供电嘅发电厂，系用太阳能发电，所以都算非常环保。

4. 用app叫嘢食仲送到埋座位

 

卡塔尔有一个外卖App叫Asapp，拥有超过60家餐厅及咖啡厅，并且喺卡塔尔大多数体育赛事中都有供应饮品或食品，顾客用佢叫嘢食，等一阵就会有人送餐到顾客既座位，咁顾客就唔驶因为等攞食物而错过咗球赛，又悭番排队时间，小编觉得呢个服务非常贴心。点解香港大球场唔学吓呢？咁咪唔驶所有球迷都等半场时间一齐涌去买嘢食罗！