两大流星雨「袭港」

 

「追星族」要注意嘞：

继11月8日，香港出现血月天文现象，在11月19日凌晨会出现狮子座流星雨的高峰期之后，本年狮子座流星雨的活跃期为11月6日至11月30日，天顶每小时的流星数目约10颗，小编建议嘅观赏时段喺11月19日午夜12时至凌晨2时。

 

而狮子座流星雨只系前奏，更大嘅流星雨，双子座流星雨会喺12月14日夜晚9点进入高峰期，天顶每小时嘅流星数目为150颗，小编建议嘅观赏时段为12月14日晚上7点半至11点。

 

至於用乜嘢器材才可以清晰欣赏流星雨？我哋访问左着名天文摄影师不动明王Vincent Cheng，佢介绍话，睇流星雨唔使特别嘅器材，只要搵一个天空够黑无乜光污染嘅地方，计啱时间，抬头就望到。如果要影到流星雨，只要你用任何能做长时间曝光嘅相机，加一支稳阵嘅三脚架，将焦距定喺无限远，扭细一啲光圈，就可以捕捉得到。佢又补充，而家好多有长时间曝光嘅手机（咁即系iPhone无份？）都可以影到星星㗎。

双子座流星雨：只要用手机加一啲简单嘅摄影技巧就拍到流星雨。（摄影：不动明王）

双子座流星雨：资深的摄星人如不动明王，不但捕捉到流星雨，更能将银河同星云拍入相中。（摄影：不动明王）

香港着名天文摄影师，不动明王Vincent Cheng

初哥学影银河相 属初级难度

Vincent仲教小编，除咗流星雨，原来适合嘅手机（咁又系讲有长时间曝光嘅机），只要稳定喺三脚架上，试多几次（如果识用PS拼相就更好）就影到好有感觉嘅银河相。

Vincent就示范咗一张用ASUS Zenfone 7 PRO同一张用Panasonic CM1影嘅银河相。两张都系喺Vincent嘅天文摄影基地拍摄。

Vincent讲，用手机拍银河只系天文摄影嘅初级难度，仲提供咗以下嘅贴士：

1. 如果系多镜头手机，最好用主镜头拍摄。

2.一定要有支稳固嘅脚架。

3.快门设定喺25-30秒

4.固定ISO值，可以试用唔同嘅ISO拍，再睇效果，理论上ISO愈低，噪点愈小，但曝光时间愈长。

5.手动对焦至无限远 （所以手机有手动对焦模式就最Good。）

6. 用RAW档案格式，方便做后期制作。

7. 色温建议调到2700k，当然亦要视乎你钟意嘅色调风格。

8. Set定时拍照，例如设定2秒后开快门，咁就可以减低按快门嗰下震到部机。

Vincent提醒初哥，摄影都系靠工多艺熟，只要试多几次就搵到自己嘅方法。熟练后就可以调教前景构图。

手机都可以拍银河，用一部ASUS Zenfone 7 PRO便能拍出这样的效果了。（摄影：不动明王）

不动明王认为用一部专门拍摄用嘅手机，拍出来嘅效果会更接近用专业相机拍出嘅效果。（摄影：不动明王，器材使用：Panasonic CM1）

城市都可以拍到星星

Vincent亦示范咗系沙田第一城，都可以拍摄到银河。但佢话市区光害严重，只能够影月亮或行星。不过，如果加上光害滤镜同特别嘅拍摄方法，市区连银河也可以拍摄得到。（但呢个唔系初哥级别了）

如果真系迷上影星，Vincent就介绍最适合初哥去影嘅两个地方：大屿山南部、大美督水坝。

当大家都经过初哥阶段，想好似Vincent咁做摄星达人，就要添置好多专业器材，呢个就系后话，Vincent话，影出深空嘅星云未必一定要去到天涯海角，就喺新界上水都可以影出精彩。

大美督主坝拍出来的银河效果。（摄影：不动明王）

大屿山昂平拍出来的银河。（摄影：不动明王）

当你迷上天文摄影，便要买一大堆专业器材，去捕捉深空中的星云，这都是不动明王於上水的基地拍出来的专业级星云图。（摄影：不动明王）

当你迷上天文摄影，便要买一大堆专业器材，去捕捉深空中的星云，这都是不动明王於上水的基地拍出来的专业级星云图。（摄影：不动明王）