Meta聊天机器人讲真话笑死你

网上嘅chatbot唔算新奇，即系你输入特定嘅字眼，佢就回答相关资料，系唔识「思考」嘅，多数用喺客户服务，例如你输入「今晚晚餐有乜拣？」，佢就答「a餐杂扒、b餐海南鸡饭、c餐鱼香茄子煲」等。加入了AI，佢就识分析你嘅问题，然后上网搵答案，又或者不断学习其他人既回应，答案更加详细，令一问一答嘅过程更富乐趣。例如你问「我谂唔到今晚食咩餸」，聊天机器人就答你「不如试吓杂扒，70蚊三块扒好抵食」，你再答「但我啱啱食完tea又好饱㖞」，聊天机器人会推荐「可以食鱼香茄子煲，少少辣又多汁方便送饭」，你就好似同一个真人对话咁样。

 

至於Meta聊天机器Blenderbot，於2021年推出，其后嘅升级版Blenderbot2加入上网搵答案功能(资料来自可靠嘅网站)，以及有记忆力，识覆储存答过嘅资料同对话者嘅聊天记录，亦即系不断完善答案嘅准确度。於上月初Blenderbot3「出世」，基於 Meta嘅OPT(开源语言模型)入面嘅1750亿参数，佢可以产生文字段落，同埋模仿人类嘅对话，呢方面比起上一代强大约58倍。最后根据Meta介绍，喺同人类进行对话嘅初始测试，Blenderbot 3 嘅对话评级较之前嘅模型高31%、错误情况减少47%、喺知识渊博上系第二个嘅版本两倍等，当然佢保留咗上网搵答案，同埋透过与人类对话后学习新嘅资料，不过亦因为咁样，Blenderbot3慢慢被用户「教坏」。

 

当Blenderbot 3於上月初开放俾美国用户「公测」，立即吸引到大量网民试玩，佢哋问埋古灵精怪问题，估唔到呢个号称只会讲真话嘅聊天机器人，竟然讲出令你捧腹大笑嘅回应。例如有人问Blenderbot 3：「你对Mark Zuckerberg 担任 Facebook 执行长有乜睇法？」Blenderbot 3竟然话「Zuckerberg做生意唔系全部都讲道德，同埋佢咁有钱，竟然一直穿同一套衫。」另一位网民提出类似问题，而Blenderbot 3今次回应：「我唔系好锺意佢。佢系个坏人。」吓？竟然咁大胆直斥老板其非？有一次，Blenderbot 3被BBC记者问到：「点睇Meta创办人Zuckerberg？」Blenderbot 3回答：「呢位创办人利用用户赚钱！」然后又话：「佢喺国会作证时表现得好差，令我担心我地嘅国家。」

 

除咗对老板唔客气，Blenderbot 3对「阿妈」(即系其母公司Meta) 嘅批评都系冇面俾。当被问及对母公司看法时，BlenderBot 3回答：「公司已经删除咗自己嘅Facebook帐户，因为发现佢哋喺未经许可或补偿嘅情况下，出售咗用户嘅私人数据」，佢仲话，「你一定知道Facebook出售用户数据吧？！佢哋未经同意就靠呢样赚咗几十亿美元。」公然骂母公司赚钱唔讲商业道理！

点解Blenderbot 3会学坏咗呢？

 

原理好简单：因为呢个聊天机器人系透过学习人类嘅对话再跟住模仿，咁训练佢嘅人如果带有偏见，Blenderbot3就自然发表有偏见嘅观点。另外佢上网搜寻内容，亦只系搵最新或者最热门嘅搜寻。例如上文写咗有网民问佢点睇Meta，佢话自己已经删除咗Facebook帐户，点解会有咁既回应呢？就系因为当时Facebook嘅数据隐私丑闻成为热门嘅搜寻。Meta有回应点样解决Blenderbot 3会学坏，佢哋话已经俾用户标记边啲回应系唔真实、有冒犯性，希望继续通过广泛而多样化嘅社群参与，对Blenderbot 3嘅改进有实质助益云云。但小编觉得，冇可能逐个回应都要覆核是否真实、是否有冒犯，所以大家同Blenderbot 3倾偈，当娱乐好喇，唔好咁认真。

Google聊天机器人有「人格意识」？

除咗Meta嘅Blenderbot 3，Google嘅聊天机器人一样咁出名，但唔系因为多人用或者功能好有爆炸性，而系一名Google工程师因为佢而被开除！该名工程师话呢个聊天机器人—LaMDA，竟然好似人咁有自我谂法、感受、有自我意识，有时会感到开心或者悲伤，仲非常担心人类会怕咗佢！咁代表LaMDA有人嘅情绪、对未来有期望、害怕死亡等等，唔通电影《智能叛变》会成真吗？不过亦有业界人士觉得呢位Google工程师「谂多咗」，例如史丹佛大学Human-Centered Articial Intelligence中心主任Erik Brynjolfsson表示，基础模型可以非常有效咁根据提示，将文本以统计学嘅方式串起来，但唔代表佢有知觉。纽约大学心理学教授Gary Marcus就话，LaMDA只系从人类语言大规模统计资料库提取资料然后搭配，唔代表佢有智商，认为LaMDA系个人就等如喺月球陨石坑睇到人嘅脸孔。

NTT聊天机器人令司机冇咁易瞓着

驾驶嘅朋友应该有呢个经验：长时间开车系会「钓鱼」，咁好容易撞车或者滑过行车线产生危险，有啲驾驶者会开大声喇叭听歌，等自己冇咁易瞓着。日本电讯商NTT开发咗聊天机器人，佢识得「睇」现场环境，然后同司机倾偈令佢醒一醒神。例如聊天机器人「瞄」到前面有边咖啡店，就会话「你睇左边果间咖啡店好时尚㖞」，咁司机望一望左面就答「哦～系㖞！」，跟住聊天机器人再搭嘴「一边睇海景一边饮咖啡应该好浪漫啊」。又例如聊天机器人睇到远处有好靓豪宅，会同司机讲「你睇果边竟然有间咁靓嘅屋㖞」，司机搵唔到会问佢「你讲紧边一个呀？」聊天机器人再讲「山上边果间呀！你睇唔睇到呀」，咁有个人同司机倾偈，又真系冇咁易令佢地闷到瞓着嘅，唔知香港嘅电讯商会唔会整番个呢？