1)      itranslate converse小心鬼祟收你钱

可以得到苹果嘅肯定，都算系实力嘅表现，iTranslate Converse获得2018年Apple Design Award，证明呢款app嘅翻译功能又强劲又好用。佢支援包含中文在内嘅38 种语言，除咗常用嘅日、韩、西班牙、德、法文，连比较冷门嘅语言但又系热门旅游地点嘅挪威、越南、荷兰、瑞典文都有。需要翻译时，只要打开App揿着手机萤幕任何地方(橙色地方就系)，而唔系特定某个button，iTranslate Converse就会「听到」你讲嘅嘢，就算你预设系中文但讲咗英文，iTranslate Converse会自动侦测到你讲紧英文，然后帮你转换为你想翻译嘅语言。如果你想转换语言，无论系讲定系译，揿住支国旗就即刻换到。呢款app最大好处系方便使用，开app、揿住个mon、等翻译结果，三个步骤就完成；转换语言亦系揿个掣就换到，同埋佢唔会听到其他杂音，所以都好适合喺人多嘅观光地点使用。

呢款app嘅缺点，就系鬼鬼祟祟想收你钱！当你首次启动app需要简单设定，当佢要你输入apple ID，记住千祈唔好入！一旦输入，佢就当你买咗付费版，小编就系咁样中咗伏！如果你想取消收费，要去手机设定，进入自己嘅apple ID版面，再选订阅，你就会睇到买咗咩apps，再点击iTranslate Converse icon然后选「取消免费试用」。另外，你要翻译嘅句子愈短愈好，句子一长，佢译翻出嚟嘅文法会好古怪。例如小编试过用韩文试下佢翻译得唔得，原意系「你的英文很好」，但翻译出嚟就变咗「英语很好」；原意系「请问你叫甚麽名字」，但翻译出嚟变咗「对不起你叫甚麽名字」，好彩同原意都接近，只系冇100%译过嚟。

2) VoiceTra最强中日翻译

上一款app就有苹果肯定，呢款VoiceTra来头仲劲，系日本政府主导开发嘅！本来预计东京奥运会带嚟大量游客，日本政府开发呢款叫VoiceTra程式，可惜人算不如天算爆发咗新冠肺炎，冇得现场睇奥运，好彩VoiceTra仲用得。由於有政府支持，VoiceTra结合咗云端运算系统，同埋AI改善翻译质素，因此喺中译日嘅精准度，远远胜过多数翻译app。使用上，佢就分为「人地讲」同「你」讲两个画面，例如你去到日本，当地人讲嘢既时间，你要将手机画面滑向左，咁app就会将日文翻译为中文；如果到你想向日本人讲嘢，将画面滑番去右，app会将你讲嘢译番做日文。如果app「听错」咗你讲乜嘢，仲可以即时用文字输入，然后俾对方睇番或者叫app读出嚟。而除咗同步支援语音及打字输入外，翻译出嚟嘅句子仲可调整字体大小，等视力较弱嘅长辈容易阅读，日本人果然好细心。

呢款app嘅缺点，首先系冇提供离线翻译嘅功能，即系手机上唔到网，呢个app就用唔到啦，建议出国旅游记得开通埋上网漫游。其次系佢听唔明广东话，你要用普通话或者讲英文，然后翻译做日文。最后佢都有记录曾经翻译过嘅内容，不过冇分类、冇分日子甚至连搜寻功能都冇，你要逐次翻译去搵番出嚟，非常嘥时间。

3) 讲话和翻译 识讲广东话

上面两个app都唔支援广东话，等小编介绍一款广东话都用到嘅翻译app啦，佢叫「讲话和翻译」，大家可以用英文「Speak & Translate」搜寻然后下载，icon系咪高峰就系喇。佢支援广东话，仲要唔系短句子、词语，而家长一长嘅句子都得，例如小编讲「你讲嘢唔好咁快得唔得，我听唔切」，英文会译做「You're not so fast that I can't hear anything」，虽然漏咗个「讲」字，但对方应该会明白你意思。另一个强项，系如果你允许app侦测你目前位置，开启后佢就会自动帮你设定好要翻译嘅语言，去日本就会自动设定日文，去美国就会自动设定英文，咁当然你手动设定都得。用法都系同上两个一样，揿掣后讲嘢，但你或对方讲完就记得揿停，否则佢就会一直听落去，同上面两只软件识自己停止录音然后即译唔同，最后佢支援多达20多国语言，环游世界都够晒用。

 

呢款app嘅缺点，首先系影相然后翻译系用唔到嘅，小编无论系影一行或者一大段文字，佢都系译咗段怪文出嚟。另外，佢同itranslate converse一样，又系鬼鬼祟祟想收你钱，你安装完过咗7日就会扣你月费，所以如果你唔想继续用，记得记得入去手机设定，然后拣apple ID选项之后取消订阅。

4) 用Google Pixel Buds 好似请咗个即时翻译

如果你锺意带耳机，又好想好似带埋个私人翻译去旅行，不妨花700蚊买Google Pixel Buds A-Series无线耳机，然后用佢连接Google助理，咁对方一路讲嘢，你就一路听到翻译出自己嘅语言，唔驶次次揿掣、然后等app写番文字出黎，劲似有个助手坐你隔离帮你翻译咁样。使用Google Pixel Buds A-Series翻译嘅方式好简单，只要用手指掂一掂个耳机，咁就启动咗Google 语音助理，之后讲「让我讲法文」，跟住就咁讲自己嘅语言，与耳机连接嘅手机，就会透过喇叭自动播放出法文。如果轮到对方讲嘢，你就喺手机揿个掣，咁耳机就会将对方讲嘅嘢转番你指定嘅语言。所以，你要同语言不通嘅人对话，用Google Pixel Buds A-Series配合手机就方便好多。

有个台湾嘅网民用过Google Pixel Buds A-Series翻译功能，得出以下评语：耳机＋手机翻译慢过手机用google翻译，毕竟耳机只系辅助，再将翻译的嘅文字讲出来，播放到用户耳中，而手机就系直接显示意思，唔驶再等。至於翻译嘅精确度，就视乎句子结构长度、讲嘢速度而定，如果以一般新闻主播讲嘢嘅速度同长度，意思大约只去到7成准确度。

5) iOS 16支援相机翻译

苹果9月7日有产品发布会，普遍相信会推iPhone14， iOS 16到时应该正式登场！呢个新iOS有个好实用嘅功能，就系相片入面嘅文字，iPhone都识得翻译做你指定嘅语言。上面介绍嘅翻译功能，都要对方讲嘢，你先做到翻译，但如果你要睇地图、路牌、餐牌、入场指示等等，得一堆文字，你去边度叫人讲俾你听先？第时你用iPhone影张相，然后iPhone就会逐项帮你翻译，你仲可以将佢复制然后贴去其他地方，例如透过whatsapp分享俾其他团友。资料显示，iOS 16相机翻译支援：英、法、德、意、中、日、韩、西班牙语等，虽然唔算多，但大部分热门旅游热点都用到啦。

用以上APPS做简单嘅日常交谈系无乜问题嘅，不过，无一个翻译软件可以做到100%无错，学多种语言几时都系有利无弊。最后，小编俾个贴士大家，想翻译得准确啲，就要讲短啲，讲慢啲。