打风最紧要识得贴好胶纸

强风袭港，家居最脆弱嘅通常都系每个玻璃窗，所以，台风嚟紧，一定要记得预先用胶纸贴好玻璃窗。

贴咗胶纸并唔代表玻璃不会破裂，而系要减缓玻璃俾强风吹烂后，唔会有碎片飞伤人。

咁点贴先至最有效？

由於玻璃中间位置最要承受变形同压力，所以用米字型嘅贴法，贴到窗框之外就做到最强嘅支撑，能降低玻璃振动频率。

咁用乜嘢胶纸最适合？

如果讲韧性，就一定系用厚嘅牛皮胶纸，但风球过后要撕走就比较难清洁，而薄薄嘅纸质皱纹胶纸用完一撕就完，好易清走，但韧性较差，未必顶得住烈风。

所以，为咗安全着想，都系用有更好保障嘅牛皮胶纸，至於透明嘅封箱胶纸就最差，不但韧性不足，而且好难清洁。

用乜纸都好，都要记紧，台风一过，就应尽快清去胶纸，因为愈迟清，愈容易留低胶迹。

停电自救法

 香港嘅供电确实系全亚洲数一数二稳定嘅，但最近都遇到大停电嘅意外，而台风期间，无论机会几低都好，都有机会造成停电意外，所以，我地不妨做好准备，当停电嘅时候，可以自救一下。

当然，自救嘅最好方法，就系喺屋企常备一台大容量嘅行动电源，而佢嘅设计要可以同时提供交流电（AC）同直流电（DC） 输出，咁天气热嘅时候都可以吹下电风扇，座枱电脑都能够喺停电期间用。小编建议要买嘅话，要挑选至少有450Wh以上电力嘅行动电源。其实买咗这种行动电源都唔会嘥，因为，如果你锺意露营或车Camping，拎去郊外用就啱晒嘞。

水浸屋自救法

 喺横风暴雨下，住系地下嘅朋友最惊就系水浸屋。所以，买定一个小型又够强嘅抽水泵先可以自救。

买一个有250W电力嘅抽水泵，平均每分钟能抽到约125升嘅小型抽水泵，可应付大部份嘅水浸屋情况，而一部抽水泵都只系500港元左右，值得放一部喺屋企傍身。

如果，家俬真系不幸浸咗，最紧要喺水退后立即整乾，抽湿机同风筒系好办法。如果系木家俬就千祈唔好搬出屋外用猛太阳晒，啲木会好易爆裂，而布质或皮质家俬就要做好防霉。

8号波返工三宝

打风最惨嘅系仲要返工嘅朋友，喺大风大雨嘅环境下，记得要穿戴好防风防水装备，如果唔系搞到一身湿，开工唔舒服之余，仲有机会冻亲呢。

 

第一宝：防水靴唔少得

「百病从寒起，寒从脚底生」，好多人以为水浸街着拖鞋湿咗脚都无所谓，其实，咁做系好易伤身体嘅，虽然话夏天热，但喺打风时间浸住脚行路，寒气会由脚底生。所以，出街都应该着番对防水靴，保持双脚乾爽系好重要嘅。

而有鞋厂更运用咗「黑科技」，除咗用防水透气嘅物料做防水靴，更加入咗热能保暖设备，用手机Apps调校双脚保温温度，确保防水兼保持适当温度。

第二宝：打风都打唔烂嘅 「台风遮」

8号风球下，系咪担遮都无用？其实，有设计师已研究出就算10号风球都吹唔反嘅「台风遮」。呢把遮系由一位荷兰人Gerwin Hoogendoorn设计，佢外型独特，呈流线形，而实际上佢真系利用咗空气动力学去设计，据讲，一面长一面短，加上有好强嘅伞骨结构，配合气流嘅物理原则，特别可以抵抗强风，就算10号风球下都保证唔反遮。

第三宝：防水又透气嘅风褛

喺暴风下，大雨系打横咁吹，就算担遮都会湿身，所以一件防水又透气嘅风褛亦都系必需装备。佢唔单止令身体保持乾爽，更能保持体温，免得吹到感冒。

选择风褛，其中一个要点系要选择防水同透气功能都强嘅面料，众多面料中，GORE-TEX应系最好嘅选择之一，就连消委会都大赞呢种面料确系防水、透气都一流。

风褛面料一般分为最外面嘅保护层、中间嘅防水透气层同里层，好嘅面料均需具备防水透气性，佢有一种合成高分子复合膜，分子间隙大於空气而小於水分子，因此阻挡雨水嘅同时能够将汗水排出。原则上嚟讲，面料所搭载嘅科技专业程度越高，风褛性能就越好。

千祈唔好㨂透气差嘅面料，因为汗水湿气排得唔好，好容易成身湿晒，搞到好唔舒服。好具代表性嘅GORE-TEX，表层有数十亿个微孔，微孔比水汽分子大好多倍，然后又比水分子细好多，出汗后蒸发嘅水气能够穿过薄膜排出，所以能够做到防水、防风、透气效果。