五大好玩又益智嘅「电子奶咀」 唔使怕沉迷学坏
日期：2022-08-21
「电子奶咀」已成不可逆转嘅趋势，家长唯有限制仔女嘅使用时间同埋拣选适合嘅电游，俾佢哋可以边玩学学习。适合细佬仔玩嘅Game，首先要吸引到佢哋，然后要有学习元素，但系要留意游戏有无课金嘅项目，仲要睇下有啲免费Game多唔多弹出嘅广告。小编就精选咗以下五款手游俾各位家长：
01
创造专属汤玛士小火车 以AR探索惊奇世界
《汤玛士迷你小火车》（适合3岁以上）
汤玛士小火车系人气极高嘅英国儿童电视节目，汤玛士小火车出嘅手机Game好玩度甚高，可以俾小朋友自己创作出专属於小火车，再走到各地去游行、探险，穿越美丽又带有危机嘅仙境、或者阴森怪异幽灵森林，最有趣嘅系透过AR扩增实景，喺现实环境呈现自己嘅创作。
游戏画质极高，就连大人都可能沉醉其中，所以，要好好控制子女玩嘅时间。另外，游戏本身虽免费，但有啲地图关卡同车型系要课金嘅，家长就要注意唔好俾子女乱咁俾钱。
02
教识小朋友17国语言
《Bimi Boo第一个词汇》（适合2岁以上）
呢个免费嘅识字手游，一啲都唔简单，除咗你嘅BB通过同识字卡片嘅互动来学习人生中第一个单词，又可以学习分类和排序，开发认知能力。
佢最劲嘅系宝宝识字卡支持17种多国语言：英语、西班牙语、法语、德语、义大利语、俄语、葡萄牙语、土耳其语、希腊语、荷兰语、丹麦等，同BB学习下其他语言原来都好多Fun，或者你会发现佢系语言天才呢。不过，17种语言其中只有普通话但无广东话。咁又无乜所谓嘅，爸爸妈妈自己亲身教BB讲罗。
游戏有12个唔同嘅主题，真系有排玩同有排学㗎。而游戏虽然要俾几十蚊先可以解锁所有主题，但玩落唔会加插任何广告又真系几好。
03
小朋友日玩10分钟 解压兼练反应
《 Crossy Road天天过马路》（适合3岁以上）
Crossy Road系如此一个古早又简单嘅手游，带领50几种好可爱嘅动物，惊险地穿过各种奇妙场景嘅马路，极有不断拉紧神经嘅刺激感，然后喺多种爆笑阵亡方式中瞬间释放玩家压力。小朋友都有自己嘅功课压力，如果每天同佢玩10分钟，欢乐轻松一下，又可以练下反应神经。
Crossy Road喺游戏中不断送玩家各式各样嘅奖赏，就算阵亡都有礼物送。累积咗金币，可以去扭蛋机中抽新宠物，可以等玩家慢慢收集50 几种宠物蛋。有咗奬赏，更令小孩玩出成功感呢。
04
做个创世神开发STEAM思维
《Minecraft》（适合5岁以上）
Minecraft可以讲系最好玩亦最流行嘅手机「沙盘游戏」。游戏无指定的玩法，玩家可以依照个人喜好及想法，自由地探索以方块建成嘅开放世界。Minecraft有多种游戏模式，例如生存模式、创造模式同冒险模式等。而Minecraft世界中好多嘢都系模仿真实世界。小朋友透过游戏可以认识到好多专业学科同技术，包括科技、工程、设计、数学、物理、资源管理、冶炼同农学等， 正正就系现今教育所强调嘅STEAM：科学（Science）、技术（Technology）、工程（Engineering）、艺术（Arts）同数学（Mathematics）五个核心思维。
Minecraft仲可以培养学生喺未来社会需要具备嘅软技能，如逻辑思维 （Logical Thinking），创造力（Creativity），解难能力（Problem-Solving Skill）同协作能力（Collaboration Skill）等。
喺Minecraft嘅3D立体世界，小朋友更可以提升视觉空间能力。需要掌握移动方式，有助建立前后左右上下嘅方向感。操控游戏都可以训练手眼协调性。
Minecraft更推出咗教育版，所以，Minecraft唔单止系一个游戏，更可以带来数之不尽嘅学习机会，对小朋友嚟讲，系一个不可错过嘅教育工具！
05
喺唯美嘅3D迷宫 培养小朋友嘅解困思维同毅力
《纪念碑谷》（适合5岁以上）
《纪念碑谷》呢款游戏证明游戏也可以成为艺术品，画风唯美、具有艺术感、好考验玩家耐性，已经系儿童手游排行榜嘅人气之作。
游戏通过探索隐藏小路、发现视力错觉，击败神秘乌鸦人，去帮助沉默公主艾达走出纪念碑迷阵。游戏一共有18关，而且加入咗AR技术功能，将神奇嘅3D迷宫世界，展现喺现实环境入面。
小朋友玩嘅时候，看似无路可走，凭住思考搵出新嘅道路，对於训练小朋友嘅解谜能力同遇难冷静思考嘅态度，好有帮助。呢个游戏唔单止可以培养出立体触觉、解决困难同唔会中途放弃嘅毅力，仲可以培养小朋友对美感同艺术嘅眼光同追求添。
不过，无论游戏点好玩，家长们都要留意限制小朋友嘅「电子奶咀」时间，多啲陪佢地，建立良好嘅亲子关系。
