齐齐体验超爽Dash Cart购物模式

 

Amazon新发明嘅Dash Cart会陆续应用喺美国Amazon Fresh超市中，而第一间用嘅系洛杉矶嘅Woodland Hills，不如我哋一齐去体验下先。

 

Amazon Fresh系Amazon推出的新概念超市，喺店外睇感觉唔到有乜特别，但入到去就见到一部蓝色嘅Alexa自助服务机，你只要对住部机讲：「Alexa，我要搵Lurpak牛油 。」Alexa就会话你知牛油摆喺边。又或者你喺屋企已用Alexa录低购物清单，入到超市用Amazon App就可以逐样嘢搵俾你去买。

 

当然，今次嘅主角系架Dash Cart，你问咗Alexa，就用手机喺Dash Cart扫一扫，将Amazon账户登入车中，就可以推去Shopping。Dash Cart个样无乜特别，同香港超市用嘅手推车差唔多，关键系车内装载大量嘅感应器同镜头，当我哋将要买嘅嘢掉入去，佢就会自动识别货品细节、价钱，透过推车上嘅触控屏显示识别结果同计算埋推车内货品嘅价钱总和。

由於推车也有磅重功能，只要放入计重量买嘅货品，例如生果、蔬菜等，Dash Cart就自动计好几重同几钱。

 

我哋除咗随时用推车Scan下件货就知货品详细资料同做紧乜嘢优惠，仲可以透过手上镜头Scan入折扣券等优惠。

 

Dash Cart亦内置咗Alexa数码助理服务，我哋可以一边推车，一边用声控问Alexa想要嘅货放喺边，亦可以问下佢今日有乜嘢优惠添㗎。

因为爽，Dash Cart可能会令你买多咗嘢

 

当我哋搵齐要买嘅嘢。就可以推车走一条Dash Cart专用出口通道，车上嘅Sensor就会自动从我哋嘅Amazon帐户俾钱，咁就完成交易，直接将货品攞走，如果超市系连接停车场嘅，咁仲方便，直接推架Dash Cart去架车度，将买嘅嘢放入车上面就开车走人。

 

咁样行超市确系好爽，又超级方便。唔怕因为「脑雾 」唔记得俾钱，又好似唔使钱Shopping咁，直接攞啲货走。By The Way，Dash Cart仲可能系大头虾嘅救星，大家有无试过买嘢唔记得俾钱就走咗去？被保安捉到真系水洗都唔清，但有咗Dash Cart就无有怕嘞。不过，等手机收到账单嘅时候，可能你会发觉自己唔经唔觉买多咗好多嘢添！呢个好有可能系Amazon Dash Cart嘅「隐藏阴谋 」，等你买得爽就买多咗嘢，生意自然多咗啦！

无人超市新趋势

 

虽然香港仲未有Amazon嘅超市，但佢嘅「无人超市」概念，加埋超级方便又新颖嘅Dash Cart，确系未来超市嘅营运趋势，香港总有一日会跟上呢个潮流嘅。