揸电动车最忌弹弓脚

江Sir话电动车用摩打同油车用引擎，动力表现上系有好大嘅分别，以前我哋揸油车，要踩高转数同埋转波（自动波都要转波但系统帮你转），先可以将最大力量引发出嚟，而摩打就只需要你一脚踩到底，最大力量就即刻爆发。踩油车嘅力量输出系偏向线性嘅，如果马力唔大亦好易揸得顺，但揸电动车时，如果右脚踩大力咗，成架车就会突然「飊前」，产生好强嘅推背感，唔识控制嘅话，就真系易放难收。

 

新牌仔最忌就系突然加速嗰下，反应不及，就会煞唔住架车。如果你系老手，揸开大脚油门嘅，当上咗部电动车，唔改习惯嘅话就真系「挫」到乘客呕。以江Sir嘅多年经验，都话要先轻踩加速板去习惯摩打加速嘅特性，用比平时更「柔」嘅方法去揸，咁至可以熟习。佢建议各位啱啱做电动车嘅车主，无论系新牌定系老手，都最好先用ECO嘅驾驶模式（即系每部车嘅悭电Mode），先用系统制约住出嘅力度，习惯咗之后先用更高嘅动力模式。而江Sir特别提醒大家，揸电动车最忌有「弹弓脚」嘅坏习惯。

电动车最烦系「一收油就挫」

电动车嘅另一特性，就系有动力回收嘅功能，当你一「收油」（唔好意思用咗油车嘅惯用语，但咁讲大家会易啲明）系统就会将动能化作电能为电池充电，但咁就会产生拖拽力，好似煞车咁，动力回收力强嘅话，就会突然用力挫一挫，呢个感应系揸油车唔会感受到嘅，江Sir话，有啲车厂为咗保持电池续航力，会特别加大回收动力，咁拖拽力就会更明显，情况就好似操控煞车差嘅司机咁，会令到架车好「挫」。江Sir建议平时开车有足够电用，最好将动力回收调到最低，减低行车顿挫感。如果某啲型号点校都唔低，就要预早轻轻收油，等动力回收嘅制动效能渐进地减慢车速，不过，都系要多熟习先会有成果，就算系老手都要练一段时间。江Sir更俾个贴士大家，就系望得愈远愈能预早做减速动作，见到红绿灯都要预早收下油。

无声车吓亲人

电动车嘅另一特点，就系行驶无声，行人很难察觉有车走紧过嚟，所以政府有法例规定电动车在某个时速以下，要发出行车声音，让行人觉察有车经过。而对司机来讲，就最好小心附近行人，预警佢地有车行紧（不过如非必要尽量少按喇叭）。无声电车除咗影响行人，亦影响司机对速度嘅感知力。

 

江Sir话，我地对於速度嘅感知，系靠视觉、听觉同体感，油车行车时引擎喺唔同嘅速度会有大小不同嘅噪音，老手凭声音可以感知到加速时嘅速度变化，但电动车无论加速几快，都无声，我地就少咗一种触觉去感应车速变化，特别对於新手来说会不自觉地开快咗，所以，江Sir提议新手多望速度计去判断当时嘅车速。

江Sir仲补充，摩打嘅加速力同静音，好容易令司机不自觉地愈开愈快，所以，勤望速度计会系揸电动车嘅好习惯。

点揸最悭电

 

经常玩悭油驾驶赛嘅江Sir，认为电动车悭电驾驶贴士同油车差唔多，都系要减低风阻、用适当嘅胎压、小心控制车速，减少煞车时间，同埋关掉冷气（不过唔好开窗增加风阻），最后就要熟习操控动力回收。而电动车同油车最大不同系，电动车慢车同停车都唔会点用电，但油车就算停车都会维持怠转，特别系塞车最嘥油。相反电动车唔怕塞车嘥电。有人话电动车愈行得慢愈悭电，但江Sir 劝告大家行得太慢会产生道路危险，用匀速40-50km/h行驶系最悭，但上到高速便不要太慢，维持匀速就可以了。

彩蛋：赛车手教你玩尽电动车性能

 

当你好熟习电动车嘅特性，咁点样可以尽情享受电动车嘅驾驶乐趣？

我哋请嚟柏煇赛车队创办人兼专业赛车手Louis Lai教大家揸电动车又爽又安全嘅方法。

首先要注意电动车的重量，因为车身重所以惯性很大，所以入弯控制车速同煞车距离都要更精准，另外就是「油门」嘅控制，因为摩打嘅扭力输出一下子就全数发放出嚟，所以要特别小心扭力输出过大导致轮胎打滑失控。

而因为电动车嘅电池都摆晒喺车底，可以做到好低嘅重心，令到架车高速同转弯时特别稳，再加埋话要就有嘅动力同双摩打前后驱动（电动车最适宜有四轮驱动设置），仲有少少推头其实系好好揸，只要懂得控制油门同入弯/出弯时机，就乐趣无穷。