好玩够型超级Mask

Xupermask

Xupermask 系Will.i.am 同精通个人防护设备及空气净化器嘅公司 Honeywell 合作开发嘅一种新型面罩。Xupermask 嘅功能都系以「型」为核心，所以佢除咗口罩嘅功能之外，仲加入LED 灯、降噪蓝牙耳塞等技术，真系令小编眼界大开。

 

Xupermask采用HEPA滤网，同时可以自行更换滤网，口罩喺左右两侧有控制按键，包含风扇控制、降噪功能控制、Led灯号控制与声音控制等等，佢嘅外观系由口一直包到去耳仔，设计都非常有型，戴出街一定系众人焦点。而口罩入面则采用矽胶材质，可以更贴合脸部轮廓，同时加强口鼻覆盖位置，提升服贴同保护性。为咗俾用户戴口罩时可以清晰咁利用手机讲电话，XuperMask 整合咗支援主动降噪的蓝牙 5.0 耳机和咪高峰，而佢嘅内置电池足够为各项功能提供约7个钟嘅使用时间。

 

Xupermask净系睇个名已经觉得佢够有型，Xupermask 读音系"super mask"，仲要同潮人Will.i.am合作，如果戴口罩要戴得型过人嘅，呢款绝对系你要嘅嘢。

闻到清新仲有靓样俾人见

Atmos

由AO Air公司出产嘅高科技口罩Atmos主要系加入过滤器同埋呼吸感应器，可以自动将佩戴者周围嘅空气过滤乾净，然后再抽入口罩入面，等佩戴者可以吸到较为乾净嘅空气。呢款口罩比市面上一般口罩嘅过滤功能强好多，官方话高达50倍！因为佢哋有专有嘅 D'Fend 系统同埋自动过滤分子水平设计，可以保护你并且清洁超过 98% 嘅颗粒物，例如 PM2.5。

 

而小编觉得佢最吸引我嘅地方就系佢口罩设计系透明设计，睇落好高级好似去咗未来世界咁，而且可以俾人睇返我哋个靓样，填补而家口罩做唔到嘅缺点，而且佢嘴巴同鼻周围系冇密封，咁样戴起上嚟应该都唔会唔舒服。

深化空气连噪音都无埋

Razer Zephyr

Razer Zephyr又被称做「行走的空气净化机」，佢最大嘅卖点系同时净化空气同噪音，连噪音都可以被净化。呢款口罩两侧设有风扇帮助空气循环，采用 N95 等级过滤材质，新冠等病毒绝对冇难度，公司都向注册美国食品药品监督管理局(FDA)注册，经实验室证明具备 99%细菌过滤率。

 

Razer Zephyr嘴部设计采用防雾透明面罩，可以俾人睇清楚佩戴者个口，搭配内建嘅麦克风及扩音器就可以放大使用者说话音量。而家市面上普通口罩成日遮住个口，有时讲嘢人哋会听唔清你讲乜，呢个功能真系非常之贴心，帮你声线降噪之余仲可以睇到你嘴型，减低咗喺沟通上不必要嘅麻烦。有人讲笑话呢款口罩好啱夜店嘅DJ用，因为夜店通常好黑，又嘈，呢款口罩仲有埋内部灯光，可以喺黑暗环境里照亮表情，仲可以透过蓝牙连线Razer Zephyr 手机应用程序调整 1,680 万种色彩同一系列亮眼效果，设计出自己专属嘅灯光秀。

尤如在森林中呼吸

LG Puricare

LG PuriCare 系一种可穿戴式空气净化器口罩，佢提供内置空气净化器、内置麦克风、扩音器同埋智能呼吸感应器，可以持续使用整整 8个钟，呢个口罩无疑系一款超级舒适而且透气嘅选择。

 

好多人都话呢款口罩睇落好舒服，因为呢款口罩外型好乾净利落，佢表面系一个光滑塑料，入面装住双逆变器风扇，而空气就喺侧边引入，再通过 HEPA 过滤器和内部过滤器过滤空气，最后污糟嘅空气就会喺底部排出，网民都话戴咗之后好似喺树林呼吸咁，好清新好顺畅。

 

不过都有唔少负评指呢个口罩好重，戴咗上块面就好似做紧肌肉负重运动咁，因为佢始终有一堆空气净化系统喺口罩入面，所以呢个都系佢缺点之一。虽然佢比较重，但系佢戴面之后系非常之紧，唔怕甩落嚟，不过会化妆嘅朋友就要留意，因为佢可能会有勒痕，唔知大家又点睇呢？

空气清新机戴上头

Dyson Zone

Dyson Zone系一款非常有趣嘅高科技口罩，因为佢系由两个产品结合喺一齐，分别系头戴式耳机同埋空气清新机，空气净化机一向都系Dyson嘅招牌技术，所以产品一推出嘅时候，大家都非常期待。

 

Dyson Zone有两个非常大嘅耳罩，呢个耳罩系一个好好嘅「袋子」，佢可以将电池隐藏喺入面，亦都附有种触摸感应按钮，等你可以方便咁控制 ANC 选项。呢个耳罩除咗有耳机功能之外，仲系一个好好嘅头带，听讲设计师喺设计Dyson Zone嘅时候，考虑到我哋平时戴口罩都系靠耳仔同埋面部去支撑口罩同埋佢嘅重量，当要喺口罩加高科技功能时，重量必然会增加，单靠耳仔同埋面部就会好辛苦，所以就出现咗呢款耳罩加口罩嘅设计。

 

至於口罩嘅部分，佢入面有一部非常之小型嘅空气净化机，呢个口罩离你块面有几厘米嘅距离，唔会完全掂到你块面，所以你吸入嘅系通过两个隐藏在耳罩中嘅电机嘅空气。当然都有唔少人质疑佢嘅防菌功效，可唔可以当一般口罩嚟用，不过Dyson方面都有讲话会推出相关配件。

 

Dyson Zone系一个非常之有创意嘅产品，佢嘅配戴方式系先戴咗耳机，再插入口罩，有边个会谂到戴口罩嘅同时可以听埋音乐，佢绝对系打破我哋对传统口罩嘅概念。

口罩越来越有趣

不过都有好多人觉得呢啲口罩真系睇过就算，未必需要买，因为佢似一个装饰品多啲，小编就觉得大家都系睇返自己嘅经济同需求去选择啦，条件许可嘅话买嚟玩吓都无妨，可能你会发现更多有趣嘅地方，创意永远都系无价之宝。