折叠式便携独木舟

想一个人泛舟湖上，但艇从何来？折叠式独木舟帮到你！折叠式独木舟轻身又容易组装，一般只需约 3 至 5 分钟就可以组装完成，简单易用，适合所有玩家使用。而且独木舟折叠后亦只占极少收纳空间，啱晒窝居香港人随时出海。

电动滑浪板

传统滑水需要快艇拖行协助，不过近年市面出咗好多电动滑浪板，靠滑浪板自己嘅引擎推动，唔需要借助外力，咁就几时想滑水都无问题！电动滑浪板有早年常见嘅喷射滑浪 (JetSurf) ，靠手柄启动滑浪板、油门加速，时速最快可以去到 55km/h ，最长使用时间达 3 小时。

而 eFoil 电动飞翼板，则系近年较热门嘅电动滑浪板。电动飞翼板板尾底部配备电动摩打，再由导管式螺旋桨推动，时速最高 40km/h。玩家可以透过蓝芽遥控手掣操控方向同速度，亦可以利用手掣上嘅显示屏幕查看航行速度同电量。 eFoil 可以连续滑行约 1 小时，充电时间则为 2.5 小时。电动飞翼板由碳纤维所制造，重量只有 13.5 公斤，相当轻盈。

电动滑浪板虽然刺激好玩，但原来佢哋同电动单车一样，都系要拎牌，否则属於违法，所以大家玩水上活动，记得要留意返！

 

站立式滑浪板

玩电动板要拎牌，咁唔想咁麻烦但但又想享受滑浪嘅乐趣，可以点算呢？有美国水上活动用品品牌就出咗款站立式脚踏滑浪板 (Stand Up Pedal Board)，等啲无滑浪经验嘅朋友都可以轻易上手，享受「水上飘」嘅乐趣。比起滑浪板，呢块站立式滑浪板其实更似一架单车，推动原理系同踩单车差唔多，不断踩踏板上的脚踏，就可以推动滑浪板前进，非常易玩。

 

风翼冲浪

风翼冲浪 (Wingfoil) 系近年好流行嘅其中一种水上活动，用风翼同水翼滑浪板嚟滑浪。风翼同滑浪板唔相连，玩家需要将双脚固定企喺滑浪板上，并且用双手控制吹气风翼，借助风力喺水面上滑行。

水下推进器

喜欢潜水嘅朋友，当然少了不配备返部水下推进器，享受水下探索嘅乐趣。水下推进器速度可达到 1.8m/s ，持续长达 60 分钟。想拍摄水底美景，推进器上有支架可以固定智能手机或运动相机，无需额外花费，就可以兼具拍摄功能。

香港热门玩水推介

生活喺香港，最幸福嘅其中一件事，就系随时都可以见到大海，几时想玩水都无问题！香港沿海岸有唔少活动中心，提供各式各样水上活动，真系几时想玩，都可以话走就走！