独留主子在家惊闷亲佢？AI玩具代替你陪宠物玩

1. 机械人主动搵宠物聊佢玩

如果你唔喺屋企，最理想就系件玩具，识得自己去搵宠物，然后撩佢玩啦，呢个叫「Enabot Ebo Air」机械人就完全做到呢个功能。佢内置AI脸孔识别以及逗宠模式，每日都会唔定时咁碌出充电器，然后行匀间屋去搵主子，搵到就会撩佢玩，例如用不同嘅行路方法或者速度(识得打圈、行八字或者急速地左右移动，好似跳舞咁样)、同埋射出红光，吸引主子注意然后追住红光嚟玩。另外佢有不倒翁设计，无论主子点样拨佢、推佢，佢都唔会两轮朝天—反咗肚就唔识郁。遇到障碍物仲会识得避开，唔驶惊机械人会卡住响枱脚、或者入咗床下底出唔番黎。最后，小编认为最正系呢个功能: 就嚟冇电，机械人识自己行番去充电器叉电！换言之，你只要将机械人充一次电，校一次逗宠模式，咁机械人就会每日都同主子玩，唔驶日日set 机！

 

另外，小编睇YouTube见有人话买咗Enabot Ebo Air机械人，但猫猫唔追嚟玩，其实系主人唔识点同主子玩啫！如果猫猫唔追住机械人，好简单，只要喺机械人身上缠住5、6寸长嘅鱼丝，后边绑住一个细细地嘅波(求其用废纸搓成都得)，机械人快速咁郁或者原地转圈，个波就会弹下弹下，猫猫见到一定会追住嚟咬啦！如果主子玩厌咗纸波，主人可以换条羽毛、或者绑两三条长长哋唔同色嘅尼龙绳，猫猫见到都会扑过去抓住。

2. 挂墙式玩具等主子经过就射激光

如果你屋企唔系好大，某啲位系猫猫一定会经过嘅，例如放食物嘅地方、饮水器等，咁呢款「Bentopal – P08 LED智能激光玩具」就比较适合。将Bentopal – P08放向离地1至1.2米咁高，当佢感应到猫猫在附近行过，就会射出5分钟激光然后自动关上，而光点系会不规则地移来移去，猫猫睇到就会扑嚟扑去。你可以设定激光快速或慢速，小编建议后者较好，因为激光郁得太快，猫猫未必跟得切，佢搵多几搵、搵唔到就唔玩㗎喇。另外，唔好将Bentopal – P08放得太高，例如你将佢放响天光板，咁佢就好容易感应到猫猫在郁动，就会不断放射激光，小编恐怕猫猫会玩得太攰。Bentopal – P08需要用USB充电3个钟，然后运作3个钟，如果开吓又停吓，都应该够猫猫玩到你返屋企为止嘅。最后要注意唔好将Bentopal – P08放喺阳光直射嘅地方，咁就会襟用好多。

3. 自己识郁嘅波仲会避开障碍物

上述两个AI玩具比较适合猫猫，跟住小编介绍狗狗都啱玩嘅玩具，首先系呢个叫「Wicked Ball」，一个识自己郁、识避开障碍物嘅波。有养过狗狗嘅主人都会知，佢哋对任何球状物体都难以抗拒，咁点解唔用网球、壁球而要玩Wicked Ball？正如之前咁讲，佢识自己郁，当主人开掣再选择跳动模式，然后转番实个壳，再放落地下拍一拍，佢就开始运作，例如弹下弹下或者四围郁动去吸引狗狗注意，当狗狗掂到个波，佢就识碌去第二边、或者跳吓跳吓，等狗狗扑上去捉去咬。10分钟后Wicked Ball会自动停止唔郁，休息30分钟然后又自动再郁过，如果半场休息时间狗狗再掂到个波，佢都会郁番陪狗狗再玩过。另外，当Wicked Ball撞到硬件例如梳化、墙、柜或者门，会识得反弹，亦都可以碌过电线，咁主人就唔惊个波卡实咗，或者唔知碌咗去边搵餐死。

 

虽然Wicked Ball有三种跳动模式，小编建议拣好动，因为其余两个模式，Wicked Ball郁动太轻微，未必引起狗狗兴趣。此外个波体积比较大(直径7.7cm)、外壳亦比较硬，狗狗可以担住佢、可以将佢揈嚟揈去，不过厂商都唔建议俾大狗玩，因为惊佢哋会咬烂个波。小编最后一个小小建议，系主人要教识狗狗，个波系玩具而唔系怪物，然后先好单独俾狗狗同个波玩。因为有主人拍片，狗狗见到Wicked Ball震上震落后就狂吠，嘈到邻居就唔好啦。

4. 有自动模式或WIFI控制嘅骨头状玩具

 

跟住呢款玩具比较适合大狗玩，佢叫Wickedbone，其实同Wicked Ball来自同一间公司，只不过将球状变咗骨头状，同埋支援WIFI，等主人可以透过手机控制骨头移动。Wickedbone同Wicked Ball一样，能够根据毛孩嘅反应做出回馈动作，例如毛孩轻力拍佢，佢就前后移动，如果毛孩大力踩落去甚至咬佢，Wickedbone动作就会变得激烈，例如快速地上下跳动或者疯狂打圈。另外主人可设定Wickedbone开启时间，例如每5、10、15、20钟郁一郁，等狗狗玩吓又休息吓。

 

Wickedbone嘅互动模式都适用於放狗时间。虽然Wickedbone支援WIFI，但有限范围是20米内，所以放狗时执行互动模式，让Wickedbone暂代主人替狗狗玩耍，就可以俾主人抖吓气。喺室外，主人可以设定Wickedbone转圈范围更大、跳动得更激烈，然后就可以坐喺度，睇住狗狗同Wickedbone互相追嚟追去。厂商指Wickedbone用嘅物料系得到美国FDA认可，就算狗狗咬烂都唔会对健康有影响，另外佢比Wicked Ball更大型更硬净，就算系人都要好大力先可以搣甩「骨头」左右两个碌，所以主人唔驶担心，骨头会俾狗狗咬甩个碌而唔识郁。而且Wickedbone系防水，出街玩完，只要开水喉冲洗骨头就乾净番。

5. 主人喺办公室地点一样可以逗狗玩

(大相: playdate)

 

主人返咗工，除咗搵自己识郁玩具帮手，亦可以自己操控玩具，遥距陪主子玩一阵。例如呢个「PlayDate」，可以经WIFI连接，主人用手机下载相关app，就可以返住工都陪到主子玩啦。首先PlayDate内置镜头，主人一直遥距操控，直至搵到主子，就可以开始玩乐时间。主人可以用手机，透过WIFI控制个波滚动方向，等主子扑嚟扑去，如果狗狗太跩，例如大力咬个波，主人可以透过咪高峰，大声叫狗狗Stop！手机APP除咗控制PlayDate滚动外，仲识得即时影相，喺手机笃个键就影到相，为主人记录下爱宠每一个搅笑嘅画面。最后，PlayDate外壳材料系一层好厚嘅聚碳酸酯，一来防摔二来防水，可以好长时间都唔会被狗狗玩烂。

总结：以上呢几件有AI功能嘅玩具，虽然可以暂时代替主人去陪宠物玩，但记住只限辅助角色，如果你想宠物同你亲近啲，依然要亲自陪佢玩，等猫猫狗狗听从你嘅指令，你哋既互动先会更有趣味啊。