定频定变频好？ 冷气机咁样用先悭到尽

变频冷气是什麽？

变频冷气或定频冷气，最大分别系有无变频器去控制供电频率俾压缩机，从而调节佢嘅运转速度：

‧当供电频率高，压缩机转速快，冷气机制冷量就大

‧反之供电频率低，冷气机制冷量亦会减少。

定频冷气嘅压缩机转速唔会有快慢，只有转或者唔转。

 

当你开着变频冷气机，变频器以超额120%-130%的电力频率，令压缩机短时间内将转速提升至最高，将室内温度迅速降低，直至室温达到你指定嘅温度，呢个时候压缩机自动调低转速，仅以所需嘅功率维持你预设定嘅温度。

简单啲讲，变频机就系因应室内温度变化，而改变供电频率，咁就唔会浪费咗多余嘅电力去驱动压缩机了。

 

至於定频冷气，你开着佢，压缩机系100%运作，直至室温跌到预定温度就唔转，咁冇冷气出，室温自然又升番，为要降回预设温度，压缩机又全力运作，不断循环，所以定频冷气机就等如你不停地揿开关掣，而且次次都系全力运作，可以想象系比较嘥电。

咁又开又关，室温又会唔会忽冷忽热？定频系咪一定嘥电过变频，控制室温又有咁差咩？睇埋落去就有更多答案。

定频变频冷气机大比拼

虽然定频与变频冷气，分别在於佢地有冇变频器去调节压缩机转速，但两者喺售价、悭电、寿命、舒适度有几大差别？

 

售价：定频冷气胜

定频冷气嘅售价平过变频冷气，因为前者已经发展咗好耐，而且运作好简单，但后者仲算系新科技，加上零件较多、需要更高技术。

小编於网上电器店友和，比较定频与变频冷气机价钱，发觉相差好远，例如同样系惠而浦一匹窗口式冷气机：

‧定频售价2,759元

‧变频就要3,549元

相差790元。

美的两匹窗口式冷气机：

‧定频售价4,509元

‧变频就要6,380元

相差1,871元。

至於挂墙式，三菱定频净冷挂墙式分体式冷气机 1匹售价3,439，而三菱变频净冷分体式冷气机 1匹则要4,759，相差更达1,320元。

 

悭电：变频冷气胜

如果我哋计埋电费，根据消委会於2016年测试发现，变频式样本比起定频式，全年悭电4成，消委会假设每年开机180天，每天12小时，以每度电$1.2推算，变频式样本每年所需的电费由$469至$567，定频式则需要$839至$908。如果将电费加埋机价考虑，起码要用多过一年半甚至再多一些才打个和。难怪有唔少租屋住嘅朋友，都唔想嘥多啲钱换部变频机了。

 

但有资深冷气机专家就话，变频机唔一定悭电，都要睇你嘅使用习惯、房间的实际制冷需求及开机时间等各种因素。

变频冷气悭电原因1：长开有着数

第一，如果习惯开冷气的时间短，变频机先要超频驱压缩机运作，系比定频机更耗电，当到达预设温度变频机维时低频供电，咁就系佢最悭电嘅时候，所以，这段悭电时间愈长，便愈能显现悭电嘅优势，据专家意见，如果屋企平均每日都连续开四个小时嘅冷气，咁就适合用变频冷气机。

变频冷气悭电原因2：睡房较合适

第二，如上所讲，大多数屋企用冷气最长嘅时间系睡房，晚晚吹住嚟瞓觉的话，用变频机绝对悭电。但如果个厅只系食饭时或睇电视时开一阵，未必日日开到四个钟，咁用番定频所花嘅电费可能差唔多。

变频冷气悭电原因3：大匹数有利

第三，要配到啱匹数嘅变频冷气机，如果买细咗匹数，冷气机为维持预定温度，唔够力之下，不断开尽压缩机去降温，变频都变超频，不但悭唔到电，仲会好嘥电。

有专家便建议，如果地方需要1匹的定频冷气机，买一部大1.5匹的变频机便更理想，因为，咁可以在更短时间将室温调到预设温度，再用低频维持，便进入最悭电的情况了。当然，如果你选择定频机，便要买刚好够力推嘅匹数，买大咗就会好嘥电。

 

维修及寿命：定频冷气长命啲？

好多人话，变频冷气一般比定频易坏，系因为佢嘅电路板、内部结构要比定频冷气复杂好多，对零件嘅要求都高好多，所以容易出现故障。

但科技系会进步嘅，变频机发展咗好几年，好多技术都更加先进成熟，一啲有信誉嘅大牌子，质素比初代进步唔少，所以坏电路板嘅机会亦大大减低，唔少用紧变频嘅朋友都话用咗几年都未坏。

据维修师傅讲，变频机坏嘅最大原因系操作不良同安装不善，仲有就系喺海边潮湿嘅环境，乜嘢冷气机都易坏。

 

另外，又有人讲定频冷气，佢嘅运作原理好简单：俾电去压缩机就转，停电就唔会转，讲落好似好有道理，其实，佢哋只系讲旧时代嘅定频机，新时代嘅定频机一样有好智能同复杂嘅功能，一样需要电路板，同变频机一样有坏嘅机会。

当然，维修变频机嘅成本确系较高，但要讲到易坏，反而系定频机嘅压缩机长期100%运行，而且时开时停，比起变频机多数时间都喺低频运行，其压缩机嘅寿命比较短。无论系变频、定频，用得好随时都可以用超过10年。

 

舒眠：变频冷气胜

在维持预设温度上，变频确系比定频优胜，因为佢可以用压缩机唔同嘅转数稳定咁维持室温。而定频嘅压缩机只能喺温度变化嗰阵选择开尽转数或停止运作，室温系会有波动嘅，但据专家解释，控制压缩机开关嘅系温度感应装置，如果设计同调校得好，定频机喺预设温度嘅控制上，大概喺2-3℃之间，人体对於呢个气温变化无乜太大感觉。

所以，好少人会投诉用定频机会觉得忽冷忽热，搞到瞓唔好觉，如果系咁，应该系冷气机坏咗，而唔关定频嘅事。

 

变频除咗控制预设温度更精准，就系低频运转嗰阵噪音少好多，但呢啲噪音只限喺窗口式冷气机，而分体式冷气机嘅室内噪音主要来自风扇运作，而非压缩机。

识用变频冷气，才能得到最大效益

正如上文所讲，变频冷气坏咗要好贵嘅维修费，想用好啲就记住以下几点：

1. 变频冷气唔好频密咁又开又关，咁样唔单止嘥电，仲会导致变频功能无法发挥，缩短变频冷气机寿命，所以着咗冷气后，就由得佢开一段时间。

2. 而家多数变频冷气都有防潮设计，长着反而有好处，因为通电会启动防潮功能，无咁易因为潮湿而整坏电路板。

3. 唔好直接关电源，咁好大机会整坏电路板，最好就系用遥控熄机，等变频冷气机内嘅电压慢慢平伏，大约需时15至30分钟。

4. 熄冷气之前，将佢由冷气模式转做风扇模式，吹10至15分钟，有助降低温差减少积水，又可以吹乾冷气机盘下嘅积水。不过咁样做其实好烦，不如买机嗰阵，㨂一款有防霉功能嘅机，佢就会喺熄机后，自动运行风扇10至15分钟，吹乾机身内部，防止发霉。

5. 隔尘网最好每个月清洗一次，另外打开冷气机面盖，里面嘅蒸发器机组都要经常清洁，但唔好用腐蚀强嘅清洁剂喷，再用牙擦擦走污垢就可以。

6. 无论变频又好定频又好，冷气机唔可以长时间唔开，如果过咗夏季，都建议每个月开半个钟，等零件冇咁易老化。

7. 唔好喺大房、大厅用小功率嘅冷气，咁会导致高负荷运转，好容易chur死部冷气。

 

 

总结：变频冷气虽然有悭电、环保、宁静等优点，但佢零件多，坏嘅机会多啲，维修费又贵啲，所以拣变频冷气，最好拣一部保养期耐啲嘅，同埋做好「如何正确使用变频冷气」所讲嘅要点，咁就会襟用好多。