七大无聊智能发明 可磅重嘅滑鼠有咩人啱用？

1. 智能鸡蛋架

 

智能鸡蛋架嘅主要功能系话畀用家知雪柜仲有几多只鸡蛋，提醒你使唔使入定货。只需连上手机程式，就可以用手机实时查看。不过，如果系一个专业嘅家庭主妇，又点会唔知屋企剩低几多只鸡蛋呢？

2. 可磅重滑鼠

 

滑鼠可插记忆卡或有计算机功能都听过，但系呢款有加设秤重功能嘅滑鼠真系令小编大开眼界，乜真系会有人拎只滑鼠去磅重？定系每日攞嚟磅下只手有几重，睇睇健康情况？除咗药剂师，大家又谂唔谂到有咩人啱用？

3. 天气预报智慧雨伞

 

落雨出街最怕大头虾漏低把遮喺商场或餐厅唔记得攞，甚至留低响边都唔记得，呢把智慧雨伞外形独特之余，更内置定位功能，只要你离开手机超过 10 米，手机就会即时发出声响通知用家，仲可以利用手机 App 追踪把遮嘅位置，咁就唔惊搵唔返把遮啦！就算唔见咗手机，用家都可以摇一摇把遮，手机就会发出声响提示佢嘅位置。听落都好实用啊，咁究竟佢无聊喺边？

 

原来呢吧遮仲有天气预报提示，等你知道今日要唔要带遮出街。其实每日开天文台个APP都已经睇到天气预报啦，仲洗乜佢再提示，佢都系乖乖地做把有定位功能嘅遮算啦！

4. 提醒饮水智能水壶

 

饮水对身体有益就个个都知架啦，不过就唔系个个每日都会饮到足够嘅水，呢款智能水壶就专门发明嚟督促人饮水。如果你两个钟冇掂过智能水壶，壶盖就会闪烁灯光，催你饮水。

 

人口渴就自然会饮水架啦，系唔想饮催都无用，不过会闪灯呢个功能或者可以当电筒用嘅……

5. 自动增值记忆猪仔钱罂 

 

小朋友细细个学识储钱好重要，所以我地细个嗰阵几乎每人都有一个猪仔钱罂用嚟储钱。宜家啲猪仔钱罂都升lv，加咗自动增值记忆功能，识得自动识别同计算硬币数值 (港币专用)，仲可以显示硬币总数值，真系连数钱嘅功夫都悭返！算系无聊得来又几实际嘅发明之一啦。

6. 记录腰围尺寸皮带扣

 

智慧皮带外型同一般正式皮带差唔多，但内建感应器，除咗记录基本日常步数之外，仲会追踪同记录你坐喺度嘅总时间，以及腰围尺寸，提醒你系时候要企起身或者行一圈，虽然听落实用，但功能同智能手环或者手表好类同，感觉有啲多余。

7. 宠物颈圈摄影机

 

一般人可能觉得好无聊，但对於爱宠之人，呢款专门针对宠物设计嘅摄影机绝对实用！将佢扣喺宠物项圈上固定住，就可以令你从宠物嘅角度望世界，体验佢嘅冒险故事，并捕捉珍贵片段，当你外出嗰阵，仲可以知道佢有冇搞搞震！

总结 7 大无聊发明比较： (5★为高)

	创意度	实用度	无聊度
智能鸡蛋架	★	★	★★★★★
加设秤重功能的滑鼠	★★★★	★	★★★★★
天气预报智慧雨伞	★★★	★★★★	★★★
提醒饮水智能水瓶	★★	★★★	★★
自动增值记忆猪仔钱罂	★★	★★★★★	★
记录腰围尺寸皮带扣	★★★	★★★	★★★
宠物颈圈摄影机	★★★★	★★★★★	★★