执屋可以吸引异性？吸引力法则助你早日「脱单」

喺介绍真人骚之前，等小编讲下咩系「吸引力法则」啦！

 

「吸引力法则」（The Law of Attraction）系新思维运动嘅一种概念，指人与人之间嘅关系可以透过正面或负面思维，从而增加正面或负面结果嘅机会。「吸引力法则」亦泛指，具有类似思维、气质嘅人，系会互相吸引，所以唔系单纯一个思维对另一个思维嘅影响。我地可以简单理解为：两个有类似思维同心态嘅人，系会彼此吸引。

 

1）日常用品成双成对

呢个真人骚名叫《GO！执！事务所》，制作组第一集就率先到访其中一位主持DJ黄正宜（阿正）屋企执屋，另一位主持「执事」JanJan，就根据「吸引力法则」，教阿正点样妥善摆放屋企物品，从而令自己容易吸引异性，最简单嘅方法就系将日常用品都要「成双成对」。例如阿正虽然单身，但睡床都需要放两个同色枕头（异色枕头会有同床异梦含意）；又例如，洗手间要有一对牙擦、漱口杯等（千祈唔好营造一个谢绝探访嘅坏气氛）。

《GO！执！事务所》

另外，如果屋企要摆花，最好用真花，唔好用乾花或假花，因为后两者都系有「假」嘅象徵意义，唔系「真」，就好似唔会有人想有假嘅爱情一样。最后JanJan语重心长同阿正讲：女仔房系唔可以乱㗎！虽然JanJan冇详细解释，但小编估计，假如有心仪对象到访自己屋企，见到间屋好似垃圾岗咁，即刻扣晒分啦！

1）碎花纹床被、花纹墙纸

其实唔止香港节目有提及教人点样「脱单」，韩国Youtuber徐恩熙，亦喺自己频道分享睡房点样摆设，提升个人魅力吸引异性。

 

首先，单身嘅人，要换一张颜色艳丽嘅碎花纹床被，例如粉红色、红色。第二，喺床头或床边放一盆花，无论系鲜花或者花形嘅摆设都可以，但记得要放双数。第三，睡房换上有花纹嘅墙纸，红色就最好，如果觉得太古怪，可以拣浅红色碎花纹嘅墙纸。

 

韩国Youtuber徐恩熙

或者有人可能会唔信所谓嘅吸引力法则，但小编觉得以上方法都几简单，想脱单嘅人试下都无妨。不过除咗呢两种方法，改善个人嘅生活习惯都好重要，一个人瞓得好、心境开朗，睇起嚟精神奕奕，比起经常垂头丧气、睡眼惺忪嘅人，一定更容易吸引到异性！