睇得太差 失了买优质物业机会

有老友话最近睇了一个非常优质物业，由於业主被银行call loan，所以叫价合理，但身边的朋友话楼市仲有得跌，叫佢睇定啲，老友想问我的意见。

我话千祈唔好问我，要问自己，如果觉得物业优质而自己又啱用，就唔好犹豫，否则苏州过后冇艇搭，但如果觉得物业质素平平无奇，的确可以等多一会，在银行call loan之下，楼价有机会继续下跌，但未必可以买到优质物业。

楼市已经下跌了一段时间，亦下跌了不少，现在进入横行时间，很多人有一个错觉，认为楼市横行，现在买与几个月之后买冇乜分别，其实分别很大，当楼市进入横行的时候，优质物业很快就会被消耗，几个月之后，即使楼价唔跌，甚至轻微下跌，都很难搵到优质物业，到那时候，用今日价钱，只能买到比现在差很多的物业，到那时候，就知道自己蚀了底。

楼市低迷时买楼有一个秘诀，就是要买优质单位，千祈唔好贪平，因为优质单位有一个特色，就是可以用作防守，当遇上另一次楼市低潮，只有优质物业才可以出售，唔好睇少这个功能，分分钟是救命，如果贪平买入一些不甚优质的物业，到有需要时，那些单位物业就算更平都冇人买。

当遇上优质物业，唔好将楼市前景放在首位，首先是自己实力，其次是物业质素，如果有能力，千祈唔好睇楼市睇得咁差，甚至唔好理楼市前景，否则，就永远活在恐惧之中，买唔到优质物业。

各区最新放盘应有尽有