耀母扬威与父亲苦干

有老友同我讲，唔知道自己老婆咁有钱，子女想买楼，佢还未有回应，老婆已经大手Full Paid资助子女买楼，以后可以烦少一瓣，但他始终唔明白，佢老婆点解咁有钱。

老实说我都唔知点解，在今次疫情，不少老友在经济上有问题，最后都是在老婆支持下渡过难关，但冇一个老友够胆问老婆钱从哪里来，其实，不少女人都好叻投资，不过她们赚了钱，不会大肆张扬，又孤寒，唔会乱咁使，以至愈储愈多，所以，千祈唔好睇少自己老婆，随时有钱过自己，但又唔好倚赖她们，唔系每一个女人都懂得投资赚钱，而事实上输钱占大多数。

老友问我，父亲或母亲资助子女买楼，是否有不同启示。这个问题非常好，如果是由母亲资助的话，这叫做耀母扬威，代表市场仍然有相当大购买力，楼市应该可以更上一层楼，但如果大家见到是父亲要苦干来支助子女，尤其是加按自己层楼来给予子女用呼吸Plan买楼，就要小心一些，楼市的购买力已经差不多耗尽，不但母亲冇钱，父亲的能力亦不足，稍有风吹草动，楼市就会大跌，当然，如果父亲可以Full Paid支持子女买楼又作别论。所以，子女买楼时耀母扬威，楼市仲有运行，如果靠父亲苦干，就要慎重考虑，千祈唔好为了自己买楼而令到一家人陷入经济深渊。