智慧家居 AI监察用电

 

美国有间科创公司Sense专门以 AI 人工智能为核心，设计智慧家电管理装置，而佢哋最新嘅发明可以监察家庭电器嘅耗电数据，再用人工智能管理用电量。Sense系用手机去操作，操作介面一睇就明，用起嚟都相当轻松。咁睇下佢系唔系真系做到节能嘞。

Sense嘅AI有自我学习功能，佢主要透过AI学习技术嚟监察成间屋各个电器嘅用电量，甚至可以侦测到每个电器嘅开关状态、用电数据，而估算出电费同用电嘅碳排量。

亦因为 AI 啱开始需要「学习」用户嘅用电模式，要喺头一个月累积相关数据，先可以开始定制出你屋企嘅用电计划。Sense 嘅介面设计的确好user friendly，顾及到一般用户要睇嘅唔系一堆堆数字，而系关於用电量嘅建议，所以 App 嘅设计做到好亲民，例如佢用大大小小不同嘅波波，去显示屋企各种电器嘅用电状况，波波愈大就代表用电愈多。

Sense 仲可以俾用家检视电器、照明同其他装置嘅使用量，AI又会推荐降低使用量嘅方法，佢嘅附加功能仲可以强大到检查到电器嘅使用状况，有无问题要维修。

Sense除咗可以即时睇到用电纪录，仲可以追踪家庭嘅碳使用情况，并提供碳排量嘅预测趋势图，推荐边个时间可以进行高耗电任务，例如喺碳排放量最低嘅时候洗衫、洗碗或者充电动车。

识得睇能源标签买电器可以悭好多电

买电器时记得睇下个能源标签，咁先可以悭到好多电，睇下个表就明白，如买一级能源嘅冷气机，最多可以悭到六成电呢。

 

用一级能源标签电器可以悭几多电 （资料来源：中华电力CLP）

家庭电器	1级比3级	1级比5级
窗口式冷气机	11%	25%
分体式冷气机	36%	61%
雪柜	41%	97%
洗衣机	23%	48%

夏天长开冷气系咪真系悭唔到电？教你几招悭电法

 

夏天最食电嘅一定系开冷气，其实识得用都可以悭到电，当然，如果你喺夏天冚住棉胎都要开大冷气瞓嘅人，以下小编俾嘅开冷气贴士就唔系几啱你参考嘞。

 

1.出门一阵间就熄冷气唔一定最悭电

好多人出门买啲嘢就返屋企，都会先熄冷气，以为咁会悭啲电，其实唔一定嘅。

因为冷气开始运作时，需要500W～1000W嘅耗功率，而等室温同冷气设定温度一致时，又要耗费100W左右。如果你只系出去十几分钟，最好继续保持冷气运作，咁至悭电。如果再想悭电啲，建议出去嘅时候可以将冷气温度调高1℃就更好。

 

 2.冷气温度调得越低越凉？

气温只系人体感知冷热嘅其中一个条件，湿度、气流、辐射都会改变体感温度，所以一味地将冷气机温度调低，唔系最有效嘅方法。人体喺吹风时，体感温度约会下降2℃左右，所以调低冷气温度，不如将冷气风量校大，等肌肤吹住冷风，有效降低体感温度。如果配埋部电风扇，提升冷气循环，咁就更悭电同凉爽。

 

3.自动模式比细风模式更悭电

吹冷气时，咪以为校细风系悭电，其实仲耗电。因为开着冷气后到室内够凉爽时，呢个过程系最为耗电，等到室温同设定温度相同后，耗电量先会慢慢降低。所以调成微风模式嘅话，都唔知要等几耐至够凉，喺降温期间制冷系统就不断扯电。如果用自动模式，系统则会跟住房间状况，选择最为适当嘅风量同风向，等房间凉爽之后，会自动控制耗电量，去保持设定温度。

 

4.用冷气机嘅乾燥模式悭到电吗？

潮湿天，我哋都知冷气机有除湿功能，但冷气模式嘅除湿效果比乾燥模式差，且冷气模式会同时令温度下降，耗费多余电力，反而乾燥模式会尽量维持一致温度，同时发挥优良除湿功能。但要提醒大家，冷气除湿效果虽然好，但亦比抽湿机更耗电，所以，单系想除湿都系用抽湿机啦。

 

5.最健康嘅冷气温度

其实身体有适应温度嘅能力，开冷气如果想悭电又健康，都系遵循医生意见，例如室内外温差最好在5至6℃之间，例如室外气温32℃，则冷气温度则要调校到26至28℃。人体能够适应与外界相差5至6℃嘅温差，若差距过大，则会造成身体好大负担，容易致病。