家长应如何帮小朋友选择电子产品？

 

既然小朋友喺学习或者生活上都冇办法避免使用电子产品，咁就要选择最好同埋最适合嘅产品比佢哋使用，以下三点系选择呢啲电子产品俾小朋友嘅时候必须考虑嘅事项。

 

(i)功能方面

市面上嘅平板电脑同埋手机喺功能上面差异可以非常大，所以选择电子产品嘅功能系同用途直接挂钩嘅。有好多电子产品例如iPad同埋iPhone，佢哋都会有出普通版同埋专业版，以呢两个型号为例，如果小朋友只系用嚟读书或者做一啲文书处理嘅用途，就未必需要买到最专业嘅版本；不过有啲牌子可能最普通嘅版本都未必有咁完善或者咁稳定嘅文书系统，呢个时候就要靠家长去留意一吓小朋友平时使用电子产品嘅用途而作出选择，家长亦都要衡量自己嘅经济状况而去选购。

(ii)荧幕大小

平板电脑或者手机都有唔同大细，其实大荧幕同小荧幕系取决於使用习惯，唔一定荧幕大比较护眼，家长要留意嘅系呢部平板电脑或者手机嘅屏幕有冇加入一啲护眼功能，例如防蓝光等。至於屏幕嘅大细的确系可以影响使用嘅方便程度，如果呢部电子产品唔需要经常带出街嘅话，可以买个比较大嘅尺寸，咁样可以方便小朋友去操作同埋观看。

(iii)系统和内存设备

相信家长都希望买部「襟用」嗰电子产品比小朋友，唔需要成日换，呢个时候就好需要睇呢部电子产品嘅内部设备，包括内存、芯片、续航力等等。

 

内存嘅话建议家长可以买多少少空间，小朋友喺学习上面好多时都要下载影片或者图片，如果空间太少好可能下载咗一两个Apps或者一两条片就已经冇晒位，咁样对於小朋友来讲非常唔方便。

 

至於芯片等内部设备，未必每一位家长都识得去判断边块芯片比较好，呢个时候可以拣番一啲比较出名同埋多人买嘅大牌子，质量就会有保证。

 

续航力方面系判断呢部平板电脑或者手机会唔会好快冇电，如果小朋友要经常带出街嘅话，就建议买一部续航力长啲嘅电子产品，咁你就唔使经常要叉电，而且续航力对於一部电子产品嘅寿命亦都有直接关系。

 

电子产品除咗有教学用途之外，亦同时包含咗非教学元素，当家长决定要俾小朋友用电子产品嘅时候，就要识得权衡利弊，因为电子产品最主要嘅影响系会导致小朋友滥用或不当实用电子产品，又或者导致近视加深等问题。加上而家网络嘅资讯非常之多，家长要好好控制小朋友使用电子产品嘅频率，同埋要尽量留意小朋友用电子产品嘅情况。

1.      电子产品内的控制模式

有啲电子产品例如iOS系统的iPhone和iPad都有控制模式可以通过一啲设定去控制小朋友嘅使用时间。

 

设定方法：

「设定」>「荧幕使用时间」>「停用时间」

然后就可以选择某啲程式喺你设定咗嘅时间内先可以使用，如果过咗嗰个时间就需要家长输入密码。

1.      合法的家长监控App

如果电子产品冇操控功能嘅话，家长可以试吓download一啲合法嘅家长监控Apps，例如OurPact、Kroha等等，呢啲Apps宗旨都系想保护小朋友等佢哋唔好上到一啲唔好嘅网站同埋进行对小朋友用电子产品嘅时间管理，呢啲apps大多数都有限制使用、网站监控、设置使用时间、锁屏时间等等嘅功能，甚至有啲可以睇到小朋友社交软件嘅使用情况同对话，你更了解小朋友使用电子产品嘅情况，以保护小朋友同埋阻止不当嘅内容。

 

不过家长要留意嘅系，呢啲监控功能好容易造成对小朋友嘅私隐问题，家长应该系监控嘅同时保留小朋友使用电子产品嘅空间。市面上亦都仲有好多种免费同收费嘅选择，大家可以去参考对比，再因应自己需要去选择。