唔好信出厂模式

有几多人系买咗部电视，从来只用出厂嘅影像模式去睇电影呢？可能为数唔少啩，原来出厂模式好多时未必系最佳画质嘅模式，如果我们想尽享高清电视嘅最佳画质，就要拎起电视遥控器去做细节啲嘅调校，如果跟住小编做，就算唔系专家都可以调出最佳嘅画质出嚟。

 

用电影模式测试电视睇戏嘅真实表垷

大家去买电视机嘅时候，尽量唔好靠喺电器铺见到嘅画质去判断边部电视靓，因为好可能部部机都有唔同嘅调校，未必系调到最靓嘅俾你睇。

一部好嘅电视机，应该有好多画质上嘅细节调校，所以在选择电视机时，不妨打开调校页，睇下电视提供几多项嘅调校，亦可以比较下内置嘅不同画质预设模式。在各种预设模式，如果你买电视主要系用来睇戏嘅话，如果有电影模式选择的话，就可以用它来测试电视机睇戏嘅真实画质，小编亦推荐大家喺选购电视机嗰阵，要求店员将每部电视都调去电影模式做比较（当然唔系每个牌子都有电影模式选择嘅）。

 

仲有一点，大家亦要注意，就系喺电器铺睇嘅电视画面，好多时都系调到去最鲜艳同最强化嘅模式，令佢嘅画面特别抢眼，但同样嘅调校若喺屋企环境睇，可能系好差嘅效果，甚至睇得特别眼攰。

 

原厂预设嘅电影模式，都系以真实重现电影画质去预调，睇惯加强模式或出厂模式嘅人，初看电影模式，都会觉得画面会偏柔、偏红（亦可以讲系偏暖）。其实，电影模式至系最贴近导演想要嘅影像效果。其余如运动模式、动态模式、生动（Vivid）等类似嘅模式，出嚟嘅效果好抢眼，好Sharp，但又系导演或电影制作人最唔想要嘅效果。如果，大家想喺屋企享受到电影院出嚟嘅影像效果，就要避免用呢类增强模式。

电影模式系最接近电视最靓嘅画面模式，但亦需要作出微调。

调校最有电影感嘅五个基本步

一般电视机都有五项主要嘅画面调校选项（可能有少部分好特别嘅型号系无嘅），分别系色温、光暗、运动平滑（或叫运动插值）、对比、锐化。我哋最好用一部制作特别精细嘅4K电影作参考，拎起电视遥控器开始调校。

 

画面光暗同对比要见细节

第一项我们先校画面嘅光暗同对比，喺LED嘅话，我哋都叫背光（Backlight），而OLED就无背光嘅，而系控制OLED嘅光度。

好多人都锺意将电视有咁光调到咁光，其实，画面太光会睇到人眼攰甚至头痛，而且仲会特别嘥电，有啲型号仲会令电视机提早老化。

请记住，调校光暗时，应系先睇暗位，我地由最暗开始校，校到啱啱好睇到暗位嘅细节，然后我哋再望光位，继续向上调，调到光位都可以保持细节为止，如果调多一度光位就消失咗细节，咁我哋调番低一度就刚刚好。

总括嚟讲，就系最暗位同最光位都见到细节就系最理想嘞。

光暗同对比嘅调校都系用同一法则就无错，太光或太高对比都系要避忌。

用出高清电影，加埋系暗黑画面去调校画质就最啱。

电影模式系最接近电视最靓嘅画面模式，但亦需要作出微调。

我哋要调出最靓画质去睇电影，不能只用标准模式，更应自己再细心调校细节。

画面唔系愈锐利愈好

好多人都觉得部电视机要够Sharp，但系Sharp唔等於锐利，而系要清晰同细节分明，所谓画面锐利，我地会觉得啲线条硬到好似会𠝹伤人咁，其实咁嘅画面效果系唔靓同唔襟睇嘅。

其实，电视机嘅锐利度调校，系一种人工强化功能，系数码化嘅锐利感，所以，我地应该将佢设定为0，即系唔加任何人工锐化效果，又或者可以上下加减1 度。其实，如果想感受电影院看电影嘅效果，校得柔和一点更好，请记住，画面追求嘅系精细，而唔系锐利。

系调校锐利度时，我们留意嘅细节位最好系皱纹或者衣服嘅纹理。

颜色同色调保留原厂设定

调校颜色，其实就系调校颜色嘅饱和度，而调校色调，也可以讲系调校画面偏红还是偏绿。

除非你对颜色有特殊嘅偏好或要求，一般嚟讲，原厂嘅设定都已经好准（有时我哋睇到电视偏色，系因为电视用得太耐老化或者坏咗啫），特别系用电影模式去睇嘅时候，就同真实无乜分别。如果真系想调校嘅话，最多系加减一至两度嘅分别。

调校锐利度，不能调得太过份，咁会令到效果好假，最好就系维持在0度或上下加减一度就好嘞。

画面嘅颜色同色调，喺出厂时已调校得很准确，我们只需上下微调一度就可以了。

色温（白平衡）系会被大脑所骗嘅

学过影相嘅，都好明白色温或者白平衡系乜，简单讲，如果我们调高画面就会偏蓝，调低就会偏红，我地又可以讲系暖调同冷调。

而色温仲有一个特点，就系我哋双眼（其实系大脑）会自动适应，即系话，无论系乜嘢色温，我哋都会看到一样嘅白色（所谓白平衡就与此相关），自动调节后，感觉唔到偏蓝或偏红。原来，厂家为咗画面更能吸引人，往往喺出厂调校上都尽量将画面调光，将色温提高（即偏蓝），但呢个唔系睇电影用嘅最佳画质。所以，当我地将预设画面调到电影模式，一开始双眼会唔习惯，觉得画面偏红同比较暗，好似唔够Sharp，但当我们习惯咗色温后，就可以感受到真实嘅电影效果。你可以做个实验，当我们睇多几日，再将预设模式转番标准后，你会突然发觉画面好蓝，睇落唔够靓添。

用专门调校画面嘅测试图去调校，系需要对调校有经验嘅人至识用。

消除鬼影无晒电影感

电视会受更新率影响，当我地睇高速移动嘅画面嗰阵，如果电视唔系高更新率型号（120Hz及240Hz），好容易会睇到鬼影，所以电视都有一个功能叫motion smoothing或者系motion interpolation。其实，系画质控制系统会喺Frame同Frame之间，产生模拟出来嘅新Frame，令高速移动概画面看起嚟更顺滑，同埋令鬼影消失。如果我哋睇一啲运动片或者用高帧率嘅摄影机拍嘅电视节目，可能会睇得好顺，但如果系用嚟睇大电影嘅话，就会觉得缺乏咗电影感，似睇高清嘅YouTube视频，Tom Cruise就喺Twitter讲过，最憎用加咗motion smoothing效果去睇自己嘅电影，觉得好假无电影感。

所以，各位电影迷，记住关咗motion smoothing先好去睇Tom Cruise嘅《Top Gun: Maverick》同佢嘅经典旧片啦。

我哋要调出最靓画质去睇电影，不能只用标准模式，更应自己再细心调校细节。