装修中伏1：厕所防水问题多

新屋装修最多问题嘅一定系厕所，好多水喉漏水等问题系喺厕所或者浴室出现，严重嘅话更会波及楼下。因为防水工程涉及嘅工序非常繁复，好多不良嘅装修公司都会想尽办法偷工减料，佢地好多时都唔跟足标准施工，甚至唔做浴室地台同埋墙身防水，以节省成本同埋工时，因为防水层系最贵，成本最高，好多时如果你冇要求，师傅就唔会特别整，最后引致一系列嘅漏水、渗漏问题。

 

建议：装修时，先检查有冇漏水，同埋要更换单位来去水喉，咁就要同装修公司倾好相关工程嘅处理方法同收费，例如喉管同安装配件嘅材料费用，列明喉管设计等等。

装修中伏2：厨房最怕装置乱咁装

对於锺意下厨嘅业主嚟讲，厨房十分重要，厨房有唔少嘅装置，例如锌盆、厨柜、洗衣机电掣/去水位等等。呢个时候选择一个能总观全局、有丰富经验嘅装修师傅就相当重要。因为厨房系一个功能性相当多嘅地方，每项装置嘅摆放位置都会直接影响厨房嘅使用，听讲过有个装修师傅将吊柜装喺抽油烟机正上方，锌盆嘅附近嘅防水层又做得唔好，去水位接驳又马虎，令到屋主厨房水浸。

 

建议：一定要叫装修师傅/公司先画草图，考虑位置摆放系咪合理，装修厨房最好预留多几个电掣位。完成装修之后要特别检查锌盆，电掣位及去水位系咪正常运作，有冇渗漏问题等。

装修中伏3：墙身及油漆最怕偷工

墙身及油漆范畴都系比较多装修中伏嘅地方，一啲装修工程中会翻新墙身，一般而言都会包括铲底、批灰及上新油漆等工序，有啲无良装修公司为咗悭人工、时间同埋用料，有时会冇跟足工序，好多时髹油无做「铲底」同埋「批荡」，会令油漆好快就剥落。

如果装修工人手工差，最常见嘅有地板、地砖出现裂痕、高低不平。所以大家喺装修完成之后记得要检查呢啲地方。

 

建议：大家都可以草拟装修合约时写清楚油漆品质同数量、颜色、品牌等，时间许可嘅话，翻新墙身嘅工程都建议每个工序都监工。

装修中伏4：家俬最忌唔啱Size又装唔稳

讲起装修当然唔少得家俬方面，最常见嘅中伏位系，如果要装修公司订购家俬，最忌佢哋用料马虎参差，将平价、旧货当新货用。

如果系度身订造家俬嘅话，有啲装修师傅喺设计摆放位置都令屋主十分头痕，例如求其度尺寸、空间预唔准、又无预电掣摆放位等等，试过有Case 系搞到要喺衣柜开个窿先用到电掣，相当唔方便亦唔美观。最怕就系手工马虎，不美观算小事，严重嘅可能会有生命危险，例如吊柜求其装上去就算，少咗粒螺丝都唔知、碌架床围栏装得太短或装唔稳等等。

 

建议：装修前先将家居尺寸量度好(记得避开电掣摆放)，然后Send俾你嘅装修师傅，等好草拟相关嘅设计图，然后再三检查同埋确认尺寸。当家俬装咗落去之后，要检查清楚是否稳固，特别系螺丝位有冇装好。

装修中伏5：电掣数目报多咗

电掣项目都系最常见嘅装修工程中伏陷阱，有啲装修师傅为咗赚多啲，无根据当初协议，自行改动或加装额外电掣位，最终令账单较预算高出数倍。亦有啲装修公司同客人倾装修设计时，游说客人记得预留多几个插座，避免之后唔够用，搞到成屋都系拖板。呢啲滥装电掣系无良装修公司最常见嘅招数。

 

建议：了解同记低自己需要用电掣嘅地方同数目，比预计嘅预留多1-2个就够，唔需要预留太多。订立装修合约嘅时候要写清楚数目同收费，如果需要加电掣数量就先要求更改合约才动工，屋主亦要多啲亲自跟进施工进度，必要时影相作为证据，完工后都要数清楚电掣数量系咪合约所写。