冇人租 應該點樣做

上星期與同事開例會，有同事話有幾個單位吉咗，應該點樣做，我話按照國際慣例，減多少租，加多少佣金，萬事有商量，最緊要是將單位租出去，又唔係賣，蝕少少底有什麼問題，同事話明白，反問點解政府面對財赤是加稅而非減稅。

這是官員與生意人不同之處，如果由生意人做官員，一樣會減稅而非加稅，好似唐英年當年面對財赤，不但冇開徵銷售稅，反而取消遺產稅以及紅酒稅，最後香港又可以渡過難關，如果當時開徵銷售稅，當然唔會取消遺產稅以及紅酒稅，甚至會出現更多苛捐雜稅，局面變成點真的很難預料。

如果財爺夠膽，應該知道地產商唔買地主要是冇人買樓，最正確做法就是減印花稅，以及撤銷所有辣招稅，刺激港人以及來港專才買樓，有人買樓，地產商自然會買地，財赤問題才有機會解決。