若要賣地賣得好，招標拍賣一齊做

政府最近將會推出12幅土地拍賣，我相信官員們最擔心就是冇人出價，或者出價很低，都唔知賣唔賣，不過賣唔賣都會影響樓市，測量師就會因應最新拍賣價調低物業估價，銀行有可能向業主追收差額，所以，對一般業主來說，唔推好過推，但在政府立場來說，保持土地供應持續是一個責任，不能夠因為市況不佳而暫停土地供應，因為如果樓市轉好，就沒有足夠供應量，樓價就會飆升，官員們就會被人責罵，不過兩者取其輕，保持土地供應始終是一個長遠之計，但政府似乎要改變一下賣地方法。

 

政府現在獨沽一味用招標賣地，而且已經行了二、三十年，不少人亦察覺到，除了政府之外，已經冇私人業主用招標賣物業，就算有都不會在招標的時候售出，大多數在招標之後，業主與買家再商討才可以將物業出售，由此可見，業主在招標的時候攞唔到最好價，不過，招標的確是公平，買家根據自己的估價而入標，輸咗都唔能夠怪別人。

 

至於點解買家在落標的時候唔出高價，寧願之後慢慢加價，行內人明白，標書其實是一份買賣合約，買家簽了之後就有法律責任成交，否則就是破壞合約，最低限度都會被殺訂，所以，落標的時候保守一些是正常，嚴格來說，招標不利業主，所以，已經很少私人業主用招標賣物業，只有政府仍然樂而為之。

 

有人話政府應該用拍賣代替招標，但官員們擔心不利小型地產商，令到香港地產被壟斷，官員們擔心亦不無道理，所以，政府可以考慮招標拍賣一齊做，並不是一幅土地招標，另一幅土地拍賣，而是真真正正一齊做。

 

最近有一幅名畫「持扇的女子」以8.530萬英鎊售出，買家是香港人，據聞這幅名畫底價是6,500萬英鎊，所以，香港政府可以考慮用這個方法，首先訂了一個底價，然後要求各地產商入標，不到底價的地產商就會被淘汰，入圍的地產才可以拍賣，如果冇地產商畀到底價，就收回土地，如果只得一個入圍，那人自動可以買到土地，如果多位地產商入圍，咁就要玩拍賣，行唔行得通，估計行得通，蘇富比都係咁樣做。

立即搜尋各區最新放盤