千祈唔好同賣了樓的人爭拗樓市升跌

有老友問我點解只在報紙雜誌發表評論樓市文章，在私人場合反而很少討論，甚至避而不談，老友可能唔明白，睇樓市升跌是很主觀，買樓或者賣樓之後，與之前睇法截然不同，尤其是賣了樓，一定會話樓價下跌，否則就唔會連自住單位都賣走，這個理由就算唔認同都唔敢反駁。

我見過有不少人同賣了樓的人爭拗，那些人當然是睇好樓市，但最後都會是失敗收場，因為賣了樓的業主會叫對方，如果咁睇好樓市，點解唔買樓，換句話說，他們基本上口是心非，根本睇唔好樓市，不敢身體力行，唔似得他們，睇唔好樓市就連自住單位都賣走。

反之一個剛剛買了樓的人對樓市亦不太肯定，我亦認為千祈唔好同那些人講樓市會下跌，因為有不少剛剛買了樓的業主心靈是很脆弱，定力又唔夠，嚇得兩嚇，恐怕那些業主會撻定，如果樓市唔跌，就無端端做了衰人，最後，做人處世，可以圓滑一點，對著賣了樓的人講樓市下跌，對著買了樓就話上升，就包保萬無一失，皆大歡喜。