1)      itranslate converse小心鬼祟收你錢

可以得到蘋果嘅肯定，都算係實力嘅表現，iTranslate Converse獲得2018年Apple Design Award，證明呢款app嘅翻譯功能又強勁又好用。佢支援包含中文在內嘅38 種語言，除咗常用嘅日、韓、西班牙、德、法文，連比較冷門嘅語言但又係熱門旅遊地點嘅挪威、越南、荷蘭、瑞典文都有。需要翻譯時，只要打開App撳著手機螢幕任何地方(橙色地方就係)，而唔係特定某個button，iTranslate Converse就會「聽到」你講嘅嘢，就算你預設係中文但講咗英文，iTranslate Converse會自動偵測到你講緊英文，然後幫你轉換為你想翻譯嘅語言。如果你想轉換語言，無論係講定係譯，撳住支國旗就即刻換到。呢款app最大好處係方便使用，開app、撳住個mon、等翻譯結果，三個步驟就完成；轉換語言亦係撳個掣就換到，同埋佢唔會聽到其他雜音，所以都好適合喺人多嘅觀光地點使用。

呢款app嘅缺點，就係鬼鬼祟祟想收你錢！當你首次啟動app需要簡單設定，當佢要你輸入apple ID，記住千祈唔好入！一旦輸入，佢就當你買咗付費版，小編就係咁樣中咗伏！如果你想取消收費，要去手機設定，進入自己嘅apple ID版面，再選訂閱，你就會睇到買咗咩apps，再點擊iTranslate Converse icon然後選「取消免費試用」。另外，你要翻譯嘅句子愈短愈好，句子一長，佢譯翻出嚟嘅文法會好古怪。例如小編試過用韓文試下佢翻譯得唔得，原意係「你的英文很好」，但翻譯出嚟就變咗「英語很好」；原意係「請問你叫甚麼名字」，但翻譯出嚟變咗「對不起你叫甚麼名字」，好彩同原意都接近，只係冇100%譯過嚟。

2) VoiceTra最強中日翻譯

上一款app就有蘋果肯定，呢款VoiceTra來頭仲勁，係日本政府主導開發嘅！本來預計東京奧運會帶嚟大量遊客，日本政府開發呢款叫VoiceTra程式，可惜人算不如天算爆發咗新冠肺炎，冇得現場睇奧運，好彩VoiceTra仲用得。由於有政府支持，VoiceTra結合咗雲端運算系統，同埋AI改善翻譯質素，因此喺中譯日嘅精準度，遠遠勝過多數翻譯app。使用上，佢就分為「人地講」同「你」講兩個畫面，例如你去到日本，當地人講嘢既時間，你要將手機畫面滑向左，咁app就會將日文翻譯為中文；如果到你想向日本人講嘢，將畫面滑番去右，app會將你講嘢譯番做日文。如果app「聽錯」咗你講乜嘢，仲可以即時用文字輸入，然後俾對方睇番或者叫app讀出嚟。而除咗同步支援語音及打字輸入外，翻譯出嚟嘅句子仲可調整字體大小，等視力較弱嘅長輩容易閱讀，日本人果然好細心。

呢款app嘅缺點，首先係冇提供離線翻譯嘅功能，即係手機上唔到網，呢個app就用唔到啦，建議出國旅遊記得開通埋上網漫遊。其次係佢聽唔明廣東話，你要用普通話或者講英文，然後翻譯做日文。最後佢都有記錄曾經翻譯過嘅內容，不過冇分類、冇分日子甚至連搜尋功能都冇，你要逐次翻譯去搵番出嚟，非常嘥時間。

3) 講話和翻譯 識講廣東話

上面兩個app都唔支援廣東話，等小編介紹一款廣東話都用到嘅翻譯app啦，佢叫「講話和翻譯」，大家可以用英文「Speak & Translate」搜尋然後下載，icon係咪高峰就係喇。佢支援廣東話，仲要唔係短句子、詞語，而家長一長嘅句子都得，例如小編講「你講嘢唔好咁快得唔得，我聽唔切」，英文會譯做「You're not so fast that I can't hear anything」，雖然漏咗個「講」字，但對方應該會明白你意思。另一個強項，係如果你允許app偵測你目前位置，開啟後佢就會自動幫你設定好要翻譯嘅語言，去日本就會自動設定日文，去美國就會自動設定英文，咁當然你手動設定都得。用法都係同上兩個一樣，撳掣後講嘢，但你或對方講完就記得撳停，否則佢就會一直聽落去，同上面兩隻軟件識自己停止錄音然後即譯唔同，最後佢支援多達20多國語言，環遊世界都夠曬用。

 

呢款app嘅缺點，首先係影相然後翻譯係用唔到嘅，小編無論係影一行或者一大段文字，佢都係譯咗段怪文出嚟。另外，佢同itranslate converse一樣，又係鬼鬼祟祟想收你錢，你安裝完過咗7日就會扣你月費，所以如果你唔想繼續用，記得記得入去手機設定，然後揀apple ID選項之後取消訂閱。

4) 用Google Pixel Buds 好似請咗個即時翻譯

如果你鍾意帶耳機，又好想好似帶埋個私人翻譯去旅行，不妨花700蚊買Google Pixel Buds A-Series無線耳機，然後用佢連接Google助理，咁對方一路講嘢，你就一路聽到翻譯出自己嘅語言，唔駛次次撳掣、然後等app寫番文字出黎，勁似有個助手坐你隔離幫你翻譯咁樣。使用Google Pixel Buds A-Series翻譯嘅方式好簡單，只要用手指掂一掂個耳機，咁就啟動咗Google 語音助理，之後講「讓我講法文」，跟住就咁講自己嘅語言，與耳機連接嘅手機，就會透過喇叭自動播放出法文。如果輪到對方講嘢，你就喺手機撳個掣，咁耳機就會將對方講嘅嘢轉番你指定嘅語言。所以，你要同語言不通嘅人對話，用Google Pixel Buds A-Series配合手機就方便好多。

有個台灣嘅網民用過Google Pixel Buds A-Series翻譯功能，得出以下評語：耳機＋手機翻譯慢過手機用google翻譯，畢竟耳機只係輔助，再將翻譯的嘅文字講出來，播放到用戶耳中，而手機就係直接顯示意思，唔駛再等。至於翻譯嘅精確度，就視乎句子結構長度、講嘢速度而定，如果以一般新聞主播講嘢嘅速度同長度，意思大約只去到7成準確度。

5) iOS 16支援相機翻譯

蘋果9月7日有產品發布會，普遍相信會推iPhone14， iOS 16到時應該正式登場！呢個新iOS有個好實用嘅功能，就係相片入面嘅文字，iPhone都識得翻譯做你指定嘅語言。上面介紹嘅翻譯功能，都要對方講嘢，你先做到翻譯，但如果你要睇地圖、路牌、餐牌、入場指示等等，得一堆文字，你去邊度叫人講俾你聽先？第時你用iPhone影張相，然後iPhone就會逐項幫你翻譯，你仲可以將佢複製然後貼去其他地方，例如透過whatsapp分享俾其他團友。資料顯示，iOS 16相機翻譯支援：英、法、德、意、中、日、韓、西班牙語等，雖然唔算多，但大部分熱門旅遊熱點都用到啦。

用以上APPS做簡單嘅日常交談係無乜問題嘅，不過，無一個翻譯軟件可以做到100%無錯，學多種語言幾時都係有利無弊。最後，小編俾個貼士大家，想翻譯得準確啲，就要講短啲，講慢啲。