揸電動車最忌彈弓腳

江Sir話電動車用摩打同油車用引擎，動力表現上係有好大嘅分別，以前我哋揸油車，要踩高轉數同埋轉波（自動波都要轉波但系統幫你轉），先可以將最大力量引發出嚟，而摩打就只需要你一腳踩到底，最大力量就即刻爆發。踩油車嘅力量輸出係偏向線性嘅，如果馬力唔大亦好易揸得順，但揸電動車時，如果右腳踩大力咗，成架車就會突然「飊前」，產生好強嘅推背感，唔識控制嘅話，就真係易放難收。

 

新牌仔最忌就係突然加速嗰下，反應不及，就會煞唔住架車。如果你係老手，揸開大腳油門嘅，當上咗部電動車，唔改習慣嘅話就真係「挫」到乘客嘔。以江Sir嘅多年經驗，都話要先輕踩加速板去習慣摩打加速嘅特性，用比平時更「柔」嘅方法去揸，咁至可以熟習。佢建議各位啱啱做電動車嘅車主，無論係新牌定係老手，都最好先用ECO嘅駕駛模式（即係每部車嘅慳電Mode），先用系統制約住出嘅力度，習慣咗之後先用更高嘅動力模式。而江Sir特別提醒大家，揸電動車最忌有「彈弓腳」嘅壞習慣。

香港汽車高級駕駛協會主席江日雄親自為《Tech實你》嘅讀者講解點揸電動車最好。

無論新牌或老手，都要先用ECO Mode或慳電模式熟習部車嘅性能。

揸電動車最忌「彈弓腳」嘅壞習慣，會挫到乘客嘔。

電動車最煩係「一收油就挫」

電動車嘅另一特性，就係有動力回收嘅功能，當你一「收油」（唔好意思用咗油車嘅慣用語，但咁講大家會易啲明）系統就會將動能化作電能為電池充電，但咁就會產生拖拽力，好似煞車咁，動力回收力強嘅話，就會突然用力挫一挫，呢個感應係揸油車唔會感受到嘅，江Sir話，有啲車廠為咗保持電池續航力，會特別加大回收動力，咁拖拽力就會更明顯，情況就好似操控煞車差嘅司機咁，會令到架車好「挫」。江Sir建議平時開車有足夠電用，最好將動力回收調到最低，減低行車頓挫感。如果某啲型號點校都唔低，就要預早輕輕收油，等動力回收嘅制動效能漸進地減慢車速，不過，都係要多熟習先會有成果，就算係老手都要練一段時間。江Sir更俾個貼士大家，就係望得愈遠愈能預早做減速動作，見到紅綠燈都要預早收下油。

電動車嘅動力回收系統會令到車子有煞車嘅效用，但控制唔好又會好挫。

初用電動車，最好先把動力回收調功能調到最低，先開順部車。

無聲車嚇親人

電動車嘅另一特點，就係行駛無聲，行人很難察覺有車走緊過嚟，所以政府有法例規定電動車在某個時速以下，要發出行車聲音，讓行人覺察有車經過。而對司機來講，就最好小心附近行人，預警佢地有車行緊（不過如非必要盡量少按喇叭）。無聲電車除咗影響行人，亦影響司機對速度嘅感知力。

 

江Sir話，我地對於速度嘅感知，係靠視覺、聽覺同體感，油車行車時引擎喺唔同嘅速度會有大小不同嘅噪音，老手憑聲音可以感知到加速時嘅速度變化，但電動車無論加速幾快，都無聲，我地就少咗一種觸覺去感應車速變化，特別對於新手來說會不自覺地開快咗，所以，江Sir提議新手多望速度計去判斷當時嘅車速。

江Sir仲補充，摩打嘅加速力同靜音，好容易令司機不自覺地愈開愈快，所以，勤望速度計會係揸電動車嘅好習慣。

因為電動車行駛沒聲，令行人很難察覺，所以就有法例規定電動車在某個時速以下要在行駛中發出聲音。

電動車發出動力時沒有聲音，令司機減卻了對車速的感知。所以要多看速度計，確認當時車速。

點揸最慳電

 

經常玩慳油駕駛賽嘅江Sir，認為電動車慳電駕駛貼士同油車差唔多，都係要減低風阻、用適當嘅胎壓、小心控制車速，減少煞車時間，同埋關掉冷氣（不過唔好開窗增加風阻），最後就要熟習操控動力回收。而電動車同油車最大不同係，電動車慢車同停車都唔會點用電，但油車就算停車都會維持怠轉，特別係塞車最嘥油。相反電動車唔怕塞車嘥電。有人話電動車愈行得慢愈慳電，但江Sir 勸告大家行得太慢會產生道路危險，用勻速40-50km/h行駛係最慳，但上到高速便不要太慢，維持勻速就可以了。

要想慳電行車，要減低風阻、用適當嘅胎壓同勻速行車。

善用動力回收系統，可幫電池充電增長續航距離。

彩蛋：賽車手教你玩盡電動車性能

 

當你好熟習電動車嘅特性，咁點樣可以盡情享受電動車嘅駕駛樂趣？

我哋請嚟柏煇賽車隊創辦人兼專業賽車手Louis Lai教大家揸電動車又爽又安全嘅方法。

首先要注意電動車的重量，因為車身重所以慣性很大，所以入彎控制車速同煞車距離都要更精準，另外就是「油門」嘅控制，因為摩打嘅扭力輸出一下子就全數發放出嚟，所以要特別小心扭力輸出過大導致輪胎打滑失控。

而因為電動車嘅電池都擺曬喺車底，可以做到好低嘅重心，令到架車高速同轉彎時特別穩，再加埋話要就有嘅動力同雙摩打前後驅動（電動車最適宜有四輪驅動設置），仲有少少推頭其實係好好揸，只要懂得控制油門同入彎/出彎時機，就樂趣無窮。

柏煇賽車隊創辦人兼專業賽車手Louis Lai教大家揸電動車又爽又安全嘅方法。

電動車重心低，過彎特別穩，但扭力大要小心控制動力輸出，避免輪胎打滑。