專治家長湊仔頭痛 7大免費學習平台有得玩又學到嘢
日期：2022-03-27
早前政府啱啱宣布全港幼小中學生齊齊提早暑假，投奔初夏嘅懷抱，殊不知下個月中又復課，呢個消息令一班喺屋企湊仔湊到好頭痛嘅家長終於可以鬆一鬆，尤其係要返工但又Work from home嘅家長。不過仲有大半個月先復課，唔想小朋友成日玩同打機，但又要返工管唔到佢地太多，要確保仔女玩樂之餘，又有花時間學習。網上一啲在家學習嘅平台就最啱咁多位家長喇! 只需要影印機、紙同筆，或者一部Tablet, 就可以俾小朋友愉快樂習! 最重要係——費用全免！
1.British Council 英國文化協會 （link: http://learnenglishkids.britishcouncil.org/）
首先同大家介紹嘅就係歷史悠久嘅British Council 英國文化協會，佢個網站有分3個年齡層，小朋友、青少年同大人。專為小朋友而設嘅平台提供唔同形式俾小朋友學習英文生字、文法、串字等等，有歌曲、小故事、影片及遊戲等。佢嘅影片仲有好多動作比小朋友跟，好似喺 ”Speak and Spell” 嘅 Sounds Section, 有條片叫Clap, Clap ,Clap，佢會邀請小朋友一齊唱、跳、拍手踏腳等，一邊學習英文生字嘅讀法，令小朋友可以愉快學習。小朋友睇完各式影片之後，家長仲可以列印題目出嚟俾小朋友做添。
2. Funbrain ( link: https://www.funbrain.com/games/tinybop-schools-demo)
Funbrain 係一個專俾小朋友學習嘅網上平台，最特別嘅地方係佢有好多學外語嘅遊戲，當中可以學到包括英文、西班牙文、德文等二十多種語言。遊戲入面配有好多生字及圖畫，家長可以為小朋友揀選想學嘅語言，佢嘅生字就會立即轉為該種語言，小朋友就可以一邊玩遊戲，一邊學外語啦! 佢仲有數學專區，亦係透過小遊戲俾小朋友從中學習，培養佢地學習嘅興趣!
3. Kindergarten Worksheets ( link: https://www.kindergartenworksheets.net/)
Kindergarten Worksheets 顧名思義，係提供大量幼稚園工作紙嘅網站，內容分為四大類，包括 Kindergarten Math Worksheets、Kindergarten English Worksheets、Learning About Our World 同埋 Kindergarten Holiday Worksheets。家長可以根據以上範圍為仔女設計專屬課程!
4. EduBuzz Kids (link: https://www.edubuzzkids.com/)
EduBuzz Kids 係集Worksheets、 Videos (youtube影片) 及手提電話Apps 於一身嘅跨平台網站，佢嘅學習教材有分級別，由pre-K 到Grade2(大概等於小二) 都有。除咗英文，仲可以學埋數學及科學。
5. IXL (link https://www.ixl.com/)
IXL 係一個鼓勵人自主學習嘅平台，由pre K 到 12th grade(大約為本港中六) 都有，以不同畫風及文字配合不同年齡嘅學生，形式係網上問答，仲即時可以對答案，答錯仲會有解題，並且可以有語音配合，課程包括英文、數學同科學。
6. 看動畫 · 悟生命 · 學品德 ( link : https://crse.eduhk.mers.hk/)
呢個網站係由香港教育大學主辦，用生動活潑嘅動漫呈現十位歷史人物嘅生平事跡，啟發學生學習歷史、文化、品德情意等，每條片仲有粵語配音添。動漫系列共有十輯，每輯動漫均配以粵語、普通話同埋英語旁白，仲附上參考教案、工作紙等等，方便家長教導仔女，幫助增進他們對歷史文化嘅認識同興趣。
7. 語你同行
呢個平台由協康會主理，針對溝通困難嘅小朋友，程式包括語言發展評估、專業訓練及治療計劃，幫助小朋友提升語言、社交同埋溝通能力；內含350幅常用詞彙圖卡，一共有17個類別，有助小朋友增強語言能力。
留意返：呢個軟件需要使用平板電腦學習，只適用於iOS。(下載:
https://apps.apple.com/hk/app/%E8%AA%9E%E4%BD%A0%E5%90%8C%E8%A1%8C/id580776079）
一表睇哂：7個免費網上學習平台
每個平台都有自己嘅特色，小編覺得用哂就可以較全面咁幫到小朋友學習唔同嘅知識，為返學打好基礎，不過最清楚自己小朋友需要喺邊方面要加強，梗係各位家長啦! 建議家長可以因應自己小朋友嘅能力及興趣揀選啱佢哋嘅課程！
