【湯文亮專欄】借唔到錢買樓，樓價又怎會跌

有老友話，香港樓市在經濟好的時候仍然升得很慢，在新冠肺炎疫情過後，有大量港人離開，樓盤充斥市場，樓市一定會下跌，他替我擔心。

我覺得很奇怪，點解老友唔替自己擔心，反而替我擔心，原來老友只得一個自住單位，無論樓市升跌，都唔會賣走，否則就要租樓住，條數點計都唔化算，所以不用擔心。我問老友，點解唔買多幾個單位，老友話，買鬼買馬，銀行都唔肯借錢。老友在不知不覺間講出樓市不跌的理由。借唔到錢買樓，樓價又怎會下跌。

上星期，筆者與上一任金管局總裁陳德霖食飯，佢問我有冇人鬧佢推出逆周期措施，我話，當日不知幾多，無論銀行家或投資者，他們認為，金管局阻住地球轉，應該好似以往一樣，可以自由向銀行借錢，由銀行自負盈虧，最多設一個七成上限。

當時，有不少人叫我同陳德霖反映，我話一定會同陳總講，在任何壓力下，都不能夠撤銷逆周期措施，否則初次置業者就要俾多很多錢買樓，負債累累，是非常危險，而炒家就會賺到盤滿缽滿。當樓市下跌，損失的人就會怪罪金管局，不少人話，我專登唱反調，唔似一個物業投資者。

大家可能不了解逆周期措施其實是定海神針，在樓市上升時，可以壓住樓市升勢，理由是大家都借唔到錢買樓。但當經濟環境不好，樓市又不會大跌，因為大家在樓市上升都借唔到錢買樓，除了自住的單位外，很少有其他單位，既然冇樓，當然冇樓可賣，樓市又怎會大跌，調整一定會有，但幅度不會很大，但不會有人說，當時金管局推出逆周期措施是做得對。

作者為紀惠集團行政總裁湯文亮