【湯文亮專欄】買樓最緊要忍得口

有年輕朋友買了一個單位之後，四出同人講，最後竟然要撻訂，很多人不明白，那位年輕人已經做得很好，在未有足夠錢買樓的時候就等，有足夠錢就忍。唔啱心水都唔買，最後出價又快又狠，結果搶到那個優質單位，但點解要撻訂收場？很多人都不明白，最難解釋就是業主殺訂後重售，售價竟然高過撻訂價，而又很快又賣得出，代表撻訂的人在買入時做了正確決定，但點解要撻訂。

很多人將投資者口訣「等忍狠」掛在口邊，以為自己做足功夫，其實，「等忍狠」只是一個大綱，其實是變化莫測，今次年輕朋友衰在一個「忍」字，並不是忍手，而是唔忍得口，買了樓四出同朋友講，好朋友就只會講一聲係呀，冇咁老友就會話小心樓價下跌，以及供唔供得起，嚇得兩嚇，寧願撻訂收場，所以，一定要靈活運用投資者口訣，不能一本通書睇到老。

作者為紀惠集團行政總裁湯文亮