交差餉都可以儲積分里數？

唔知大家平時用咩方法交差餉同地租？自動轉賬、支票、PPS，定係去郵局排隊交現金？雖然自動轉賬最方便，唔使每季自己交錢，不過並唔係最著數嘅交費方法！

 

其實交差餉同地租，都可以用信用卡繳交，從而儲積分、飛行里數或者現金回贈，只不過無得好似平時網上購物咁，喺政府網站上面俾錢。而係要登入自己嘅網上銀行，選擇「繳費」，就可以揀選信用卡繳交差餉地租。

 

網上銀行嘅網上繳費入面，選擇返「差餉物業估價署」做受款人，再填返差餉單上面嘅戶口號碼，就可以用信用卡交差餉地租喇！

不過網上繳費唔同一般簽賬，並唔係每間銀行嘅信用卡，用呢個方法繳交差餉地租都可以儲到分，一定要睇清楚自己手上邊張信用卡有分先得呀！以下就係部分可以用信用卡網上繳費賺分嘅銀行：

1) 滙豐  2) 恒生  3)中銀  4)建行

 

同埋即使網上繳費可以儲分嘅銀行，每月網上繳費儲分都可能有上限，例如滙豐信用卡只限每月頭$10,000繳費先可以獲得積分，如果多過$10,000就要留待截數日後先可以有分喇！

 

有心交差餉儲積分嘅精明業主，記住喺下次季交差餉嘅時候轉用可以儲分嘅信用卡，登入網上銀行交費喇！