唔借錢俾人買樓就是最好辣招

上星期五中原指數繼續下跌，已經連續下跌4個星期，今次跌幅擴大，接近1.5 ％，撤辣之後樓價升幅差不多全部蒸發，一向睇淡樓市的人立刻話，香港樓市弱勢已成，就算撤辣都冇用，對於樓市支持者來說，事實勝於雄辯，的確無話可說，不過，影響樓市升跌不止辣招，還有利息以及銀行對樓市態度。

有人話我搵藉口，其實並不是，自從美聯儲局去年暴力加息之後，樓市才下跌得比較急，在加息之前，即使經歴三年疫情，樓市仍然可以保持平穩，加息之後，利息由2%在短短幾個月提升至接近6%，不少業主本來每月租金收入是有盈餘，但加息之後就變成入不敷支，如果投資者現金流控制唔好，唔好講再買樓投資，甚至要賣走手上一些物業，來達到收支平衡，多人賣，少人買，樓價想升都難，不過大家亦不用太悲觀，歐洲已經開始減息，美國亦不用等太久，當美國開始減息，樓市就會重拾升軌。

有一個大家都想唔到樓市下跌因素，就是銀行唔願意借錢俾人買樓，按揭貸款業務差不多全線暫停，不但如此，銀行除了唔借錢俾人買樓，仲向不少做了按揭貸款的業主call loan，結果可想而知，所以，在撤辣之後樓市仍然不能飆升，這是一個主要理由，亦是不幸中之大幸，如果政府唔及時撤辣，樓市有機會太幅調整，不少業主會被銀行call loan call到失魂，甚至要出售手上最優質的物業。

政府官員睇到銀行唔放貸，追差額，令到樓市下跌，不其然會話，早知燈係火，唔使隨處摸，當日不用推出辣招，只是吩附銀行不但停止做按揭，仲要以樓價估值下跌為理由，即使他們按時還款，一樣要向業主追收差額，咁樣做樓價一定會下跌，既然樓價下跌，政府就不用推出辣招，況且，追差額，唔做物業按揭，是銀行的商業決定，政府就不會被人話干預自由市場，一個在自由經濟的社會，大逆不道的政策。