保命容易保本難

陳老闆一句保本保命，實在發人心醒，尤其是地產界有關人士，包括發展商，收租佬，不但經常將保本保命掛在口邊，甚至身體力行，以行動保本保命，而最實際就是出售手上資產，所以，近日大家都見到不少物業投資者出貨，唔好以為他們收到什麼不利消息，出貨只是保本保命而已。

我相信很多人唔明白保本保命的意思，保本代表唔使輸錢，相信唔係太多物業投資者可以做到，只要他們在過去幾年曾經買入物業，或多或少都要輸錢，簡單來說，即是保唔到本，但由於借貸比率不高，即使樓價下跌兩三成，但仍然未輸到入肉，必要時將物業賣走便可以解燃眉之急，咁就可以保到條命，如果投資者賣走哂所有物業仍然是負資產，咁樣就真係連命都保唔到，不過，現在情況亦不是太壞，大多數物業投資者保命可以，但保本就艱難。

點解投資者可以保到命，嚴格來說，就是借貸比率不高，不過，借貸比率不高並不是物業投資自願，而是被金管局強制，上一任金管局陳總裁用一個逆週期措施，將物業借貸比率由七成下降至四成，仲要計壓力測試，租金收入等難關，當時，大多數物業投資者都不滿意，認為金管局限制他們的投資，銀行亦不滿意，逆週期措施令他們少做很多地產投資生意，但估唔到這個逆週期措施，救了不少投資者，就算要輸錢，但仍然可以保命，否則，當樓價下跌兩三成，已經有不少物業投資者輸命，而且如果沒有逆週期措施，在長期低息環境下，樓價會先急升，後急跌，最後一定會有很多地產佬輸到入肉，甚至要破產，咁樣就真係不但本保唔到，命都保唔到，現在都算好彩，即使保唔到本，最低限度可以保到條命。