在上斜dup停 再開車梗係要加大油

有老友唔明白，政府見樓市下跌，已經半撤辣，而且放寬專才稅以及重啓投資移民計劃，但始終冇辦法令樓價停止下跌，現在搞到政府財赤嚴重，最後除了加稅之外唔知有什麼辦法，而事實上已經有親政府團體叫政府加離境稅以及資產增值稅，開徵GST銷售稅始終是遲早的事，究竟加稅是否可以解決財赤問題。

 

如果加稅可以解決財赤問題就不是問題，最怕愈加稅，收入愈少，今日政府出現大額財赤，主要是冇人買樓，地產商見新樓賣唔出，又唔敢投地，大大話話令政府唔見咗700億買地收入，加上物業買賣的印花稅，地稅，差餉等，如果政府有那些收入，財赤的數字就會大幅減少，明年可以肯定有盈餘，現在是望天打掛，希望市民去買樓，地產商恢復買地，但如何推動市民買樓，我相信唔係咁多官員知道，知道的又唔會講。

 

可惜大多數政府官員都有司機配套，如果他們自己揸車的話，就會發覺在上斜時dup停架車，再開始時唔係唔再踹brake 就可以，一定要加油，如果斜坡愈陡，加油愈多，唔踹brake 架車唔會好似在平地會自動向前行，現在政府只是半撤辣，樓市在沒有動力之下又點會回復正常，政府要樓市回復正常一定要加油，究竟油是什麼。

 

汽車的動力是燃油，樓市的動力是資金，加油的意思是放寛逆週期措施，令到持有多個單位的業主可以利用放寬逆週期措施的資金投入樓市，或者不用賣摟來滿足金管局要求，當業主利用物業得來的資金啓動樓市之後，樓市便會再次啓航，樓價是否上升並不重要，只要成交量增加，樓市便會回復正常，香港經濟亦會回復正常，唔需要考慮什麼離境稅，資產增值稅，GST等，香港亦會很快回復有盈餘的預算案，問題是香港政府，金管局，銀行夠唔夠膽放寬逆週期措施，其實亦不用太多，10 ％已經足夠。

各區最新放盤應有盡有