千祈唔好將立小妾當逢場作興

我初出道時，以昨夜星辰昨夜風心態去飲花酒，即是同小姐當晚可以卿卿我我，但點都唔會上身，因為我見過不少朋友，最初時話與那些小姐只是逢場作興，不會認真，但結果那些小姐做了二奶，三奶，最後都是家嘈屋閉，悲劇收場，歸根究底都是不了解什麼是逢場作興，而逢場作興的意思就是唔好上身。

在過去幾年，有不少已經有自住單位的人入票新樓盤，如果有人問他們就會話只是逢場作興入票，唔會真係買，況且超額認購幾十倍，唔係咁輕易可以買到樓，又唔知點解，那些逢場作興的人又真係會抽到，當抽到之後他們亦改變主意，認為咁難都可以抽到，千祈唔好將好運趕走，況且又唔需要立刻俾哂錢，一成首期是冇問題，於是無端端就買了第二個單位，當接近入伙時就會發覺上會很困難，一定要用地產商的呼吸Plan，利息稍為高一點都不是問題，但是很難賣走，因為地產商不會為二手買家提供呼吸Plan，最後，那些本來無憂無慮的業主，因為逢場作興而搞到自己財困，甚至要將自住單位賣走，不過又唔能夠怪人，是他們自己不了解逢場作興的意思。

有人話，第一個單位就是老婆，一定要有，而第二個單位是逢場作興，不用太認真，我認為第二個單位是小妾，最好的結果當然是享齊人之福，擁有兩個單位，萬一不幸，就連大婆都冇埋，即是因為買了第二個單位而被迫出售自住單位，因為第二個單位唔係咁容易賣得走兼要付特別印花稅，所以，買第二個單位不可以話逢場作興，睇吓樓就真正是逢場作興。