香港今年的GDP增長率只有3%，稍稍低於預期，我認為財爺本來話以平常心面對，但點知俾發展局局長講先一步，局長話以平常心面對今年有五幅土地流標，立刻俾人插到暈，平常心代表公務員心態，即是你有你死，佢有佢返屋企，土地是否流標局長都是收咁多人工，點解唔係以平常心面對。既然有五次流標，政府就應該改變一下出售土地方法，招標冇效就改為有底價拍賣，未必一定可以賣得出，但自古成功在嘗試。

有人問疫後GDP增長只得3%是否很低，老實說，不單止低，而且低無可低，好彩香港仲有老本，否則就要發債，加稅，甚至要開徵銷售稅，至於點解GDP增長率咁低，簡單來說，是由於政府集中打擊炒樓活動，置民生經濟不顧，現在樓價雖然比高峰時下跌了17%，但由於樓價下跌，令到不少投資者冇多餘錢去買股票，甚至要賣手上股票來應付銀行call loan，結果恒指下跌差不多一半，不少大藍籌下跌六成，而股票市值比資產淨值大幅折讓，原來賤物鬥窮人的日子已經悄悄來到。

政府打擊樓市最後傷及香港元氣，辣招令買樓的人減少，樓價下跌，銀行收緊信貸，做緊生意的業主根本沒有多餘的錢去拓展生意，能夠保持已經算唔錯，但不排除有一些業主因銀行收縮信貸而將生意結束，做生意的人減少，經濟又怎會活起來，本來，政府官員應該改變一下管治策略，趁復甦的時候撤走早已不合時宜的辣招，而且仲要徹底一些，有幾多撤幾多，務求使樓市成交量增加，而根據角動量守衡理論，有足夠成交量的樓價才是真正樓價，只要有足夠成交量，無論樓價升跌，市場都會活起來，才可以令香港慢慢復原，否則，不但夜繽紛搞唔起，仲令到不少市民為了慳錢而要山長水遠去深圳買一些平價貨，老實說，如果搵到錢又點需要慳，樓價高企並不但不是洪水猛獸，反而是動力泉源，現在已經有不少香港人羨慕新加坡樓價高企，非常奇怪。