租客最怕業主是同行

星期一早上開例會時，有同事話在星期日入了一個舖位租客，不但租金唔錯，而且即時起租，原因是新租客的舊業主收樓自用，租客與業主是同行，當日疫情時租客捱義氣租了那個舖位，在悉心經營下兼疫情過去，生意唔錯，業主突然收樓自己做，令到租客驚惶失措，好彩我們有一個舖在附近，租客連價都唔講，只希望一張比較長租約，同事叫新租客不用擔心，我們只是收租佬，唔會收舖自己做，有人替我們養舖，何樂而不為。

近日有不少去了新加坡的投行或者基金經理回流，他們常用的解釋就是美國對香港解除第四級別旅遊警告，代表他們可以在香港可以正常生活，最緊要是可以買保險，而比較少用的解釋就是新加坡市場太細，一時間容納唔到咁多專才在新加坡搵食，所以返嚟香港，亦有人話去到新加坡只是二等專才，根本不受重視，輸比疊碼仔幾條街，如果繼續在新加坡搵食，做疊碼仔好過做金融專才。

其實那些金融專才的遭遇好似我的新租客，新加坡有兩個大金融機構，所有金融生意都可以做，不過要打擊香港就要搶香港人才，去到之後香港金融專才就會發覺自己只是陪襯品，就算是自己手上的客戶，隨時都會被政府金融機構拗走，在人去樓空之後，金融專才發覺不但搵錢少了很多，而且手上客戶亦沒有了，返香港是最好辦法，其實，如果金融專才知道租客最怕業主是同行，就唔會去新加坡。