由於我是一個睇樓市比較樂觀的人，而事實上又唔到我唔樂觀，如果我睇樓市太淡，就會有人質疑我點解只是唱淡，而自己又唔賣樓，下一句就是口是心非。

最近報章不時刊登5年前買入，現在蝕讓10幾個％的成交個案，其實亦有賺錢的交易，不過報章並沒有刊登出來，引致不少人認為樓市大跌，甚至會有一些人話信錯我，在五年前買了樓，現在唔見咗10幾個％，這個情況時不時都有出現，如果樓價上升，我很少聽到有人多謝我，而事實上我只是做分析，又冇叫他們買樓，而有冇買亦冇人知道，所以很難以常理作出反擊。

我唯有同那些人講，叫他們買樓即是救了他們，否則，就算唔買股票都會買債券，到今日得返一半已經算好，隨時可以清零，一定會有人回應人話，如果唔買樓，啲錢會做定存，即使利息0.1 ％都唔緊要，那些人可能唔知道，如果佢唔買樓都要租樓住，五年租金都有10幾個％，唔輸得幾多，但一個肯接受0.1 ％定存的人，一定唔會接受其他的投資意見，無論買樓，買股票，買債券都唔會聽，又點可以賴我。