今年細價樓將會有顯著升幅

老友問題令我想起另一個問題，如果豪宅跌幅不大，中小型住宅就會加大跌幅，否則做唔到整體樓市下跌15 ％，據我了解，中型單位的跌幅大約是15 ％，換句話說，細價樓的跌幅驚人，唔怪之得我們近日見到一些細價樓成交價，業主買入那些細價樓已經幾年，仍然要蝕讓，真係想都想唔到。

細價樓跌幅驚人有多少是政府所累，或者政府是好心做壞事，容許買細價樓的人做八、九成按揭，樓價上升當然冇所謂，一旦樓價下跌，那些用高成數按揭買樓的業主很快變成負資產者，而事實上負資產數字急升，現在已經超過一萬二千宗，那些負資產業主放棄的話，很容易又會出現另一單蝕讓，不知不覺令細價樓跌幅加大，估計在去年最低限度下跌超過20 ％，一年時間下跌咁多，的確是很驚人。

老實說，細價樓的確唔應該跌咁多，但細價樓業主很多都是初次置業人士，面對排山倒海話樓市下跌聲音，一定要有驚人毅力才可以持貨不賣，但是初次置業者又點會有這個能耐，尤其是細價樓已經變成負資產，早一日賣走還有機會解決問題，否則愈欠愈多，最後只有走路或者移民。

由於去年細價樓跌幅驚人，不過今年初銀行已經調高估價，負資產數目將會大幅下降，我估計今年細價樓將會有顯著升幅，如果沒有必要最好唔好賣樓，否則有可能左一巴右一巴，賣咗樓之後樓價上升慘過買樓之後樓價下跌。