含金防霧塗層又薄又可屈曲

呢個發明由蘇黎世聯邦理工學院(簡稱ETH)嘅教授：Dimos Poulikakos和Thomas Schutzius領導，佢地嘅團隊開發到一種可以將陽光轉化為熱量、超薄又透明嘅含有金粒子嘅防霧塗層，將佢貼喺眼鏡、汽車擋風玻璃和其他表面，就可以永久防止鏡面起霧。

傳統嘅除霧劑含有「親水分子」，令冷凝水均勻分佈喺鏡面，然後結成一層水薄膜而唔係水珠，令透過物體嘅光線唔會產生散射，咁鏡片就唔會起霧。而ETH呢塊含有金粒子嘅防霧塗層，原理係利用熱量來對抗霧化。因為金嘅粒子會吸收陽光嘅紅外線，令到塗層嘅溫度比周圍空氣高攝氏8度，咁就可以阻止水分喺鏡面凝結。另外佢只係吸咗紅外線，冇理到其他可見光同紫外線，所以塗層仍然係透明。而金粒子就被兩層超薄嘅二氧化鈦夾住，防止金粒子流失，理論上係永遠用到，唔會抹幾抹就失去作用。雖然用到金，但用量極少，金層僅只有5奈米咁厚，每平方公尺材料就用到100毫克嘅金，假設一副眼鏡係2×15平方公分，即係只需要0.3 毫克嘅金，成本價只係 0.017美元。

由於呢個含金嘅防霧塗層厚度只有10納米、透光、可屈曲等，所以適用於其他透明物體，例如汽車玻璃、鏡、光學傳感器等，因為佢吸引紅外線熱力，所以間接好處係唔令汽車或單位喺夏天時變得更熱。不過佢都有限制，就係需要足夠嘅的光，才能產生加熱效果。呢項研究已經喺《自然奈米技術》（Nature Nanotechnology）期刊發表，並希望盡快推出市場。

坊間智慧：玻璃防霧貼士

含有金粒子嘅防霧塗層仍未買到，咁除咗用防霧劑，仲有冇其他方法呢？如果係汽車，小編教你用兩個方法令車擋玻璃唔會起霧。首先係打開空調但吹熱風，咁玻璃熱咗就自然冇霧氣凝結，但壞處係耗油耗電。另一個方法係開對流窗，即係兩邊車窗都打開一條隙仔，令車內嘅空氣對流，咁車入面空氣溫度接近外邊溫度，起到去霧的作用。但呢個方法喺落雨或者室外溫度好凍就用唔到喇。

至於家居嘅玻璃同埋鏡，又如何防止起霧呢？可以用番梘水、酒精或者鹽水，用濕布浸一浸然後抹落去玻璃、鏡嘅表面，再用乾布抺番走水份就可以。不過這方法，係要次次做，好鬼煩。