努力唱淡樓市原來是想執平貨

有老友同我講，有一個去年大力唱淡樓市的分析員在接受訪問時表示，他在去年11月已經知道中國改變防疫政策，準備與香港通關，亦趁樓市在未回升之前搵劈價盤．但可惜搵唔到，老友覺得那位分析員有失君子風度，知道抗疫政策會改變，不但沒有叫人唔好賣樓或者快啲買樓，反而利用這段空檔唱淡樓市，自己搵劈價盤。

老友可能搞錯，在去年11月，我相信中央政府仍未決定改變抗疫政策，放寬是其中一個方案，分析員又點會知，只不過是跌落地揦翻拃沙，話俾人知他早已知道中央會改變抗疫政策，他預測樓市下跌只不過想執平貨，並不是預測不準確，其實，如果知道中央政府採取較為放寬抗疫政策，又與香港通關，樓價一定會上升，就算以當時市價買到樓，已經立於不敗之地，點解做要業主劈價，由此可見，他根本唔知道中央政府會改變抗疫政策，亦唔知中港可以咁快通關，如果可以劈到價，輸的機會就會減少，所以話，口講並不是真的，行動最實際。