一般市面上有賣嘅保暖衫主要都係用棉、羊毛、羽絨、纖維等等，呢幾種物料各自有唔同嘅特性，好處同壞處。

新科技保暖衣料的例子

I.  保暖兼可以減肥：石墨烯衣料

石墨烯係一種具有蜂窩狀結構嘅碳，通常用於製造電池、油漆等物品。佢有很多好處，例如非常輕、高韌性、高傳導性、熱傳導性能好等等，所以佢喺運動同醫療用品上都有好多用途，最近亦廣泛運用喺紡織品。

 

a.    石墨烯如何保暖？

因為石墨烯嘅熱傳導性能非常好，佢可以吸收能量產生共振，因為人體嘅溫度大概喺36℃左右，佢吸收咗人體產生嘅能量之後就會釋放出特定頻率嘅遠紅外線，從而達到瞬間保暖嘅效果，佢仲可以同人體嘅分子產生共振，增加體內循環，保暖得嚟仲可以減肥！

 

b.    石墨烯安全嗎？

我哋對石墨烯嘅擔憂係呢個物質會唔會產生過敏反應？有學者提出因為石墨烯好輕，佢嘅顆粒比較細，如果佢有害或者致敏就會有好大問題。不過已經有專家澄清石墨烯係一種低過敏性嘅物質，即係話大家都唔需要太擔心會造成皮膚敏感等嘅過敏反應。

Ⅱ.   開蓋透氣關蓋暖：智能衣（尼龍加銀）

美國有教授研發嘅呢件識「開蓋關蓋」嘅衫，呢到所指嘅蓋係喺尼龍上加一層薄薄的銀，然後再喺加工咗嘅尼龍布料上剪出一格格類似口袋嘅「蓋」，作用係提高透氣度，當有汗水嘅時候就會膨脹打開，乾嘅時候就會合上。尼龍上嘅銀可以反射身體嘅熱量，關「蓋」嘅時候就可以達到保暖功能。

Ⅲ.  舒服過半絨：異型斷面聚丙烯腈纖維（PAN纖維）

異型斷面聚丙烯腈纖維（PAN纖維）係較為環保嘅乾法紡工藝，因為喺製作過程當中，溶劑(DMF)會被熱氣從溶液中分離，經過蒸餾回收之後可以重新使用。異型斷面聚丙烯腈纖維（PAN纖維），具有特殊嘅雙T狗骨型截面凹槽，呢個設計可以保留更多靜止嘅溫暖空氣，從而達到保暖嘅效果。

呢種織物蓬鬆度比其他纖維高10%，保暖性比棉高17%，可媲美羊絨。佢造出來嘅保暖衣，柔軟修身，冬天可以唔使再穿著臃腫嘅衣物。佢仲有一個優點，就係透氣性好，具有獨特水分芯吸功能，可以更好咁將濕氣排出體外。

Ⅳ.  防風防水夠保暖：BLOCKTECH

保暖原理除咗留住自己嘅體溫之外，擋風都係其中一個關鍵，好似Uniqlo嘅防風雨BLOCKTECH外套就運用咗BLOCKTECH材質，呢種材質嘅特性係可以喺外套外層形成一層防水薄膜，從而達到防水防風嘅功效，減低身體失溫嘅機會。不過單靠BOCKTECH材質嘅保暖效果一般，建議配搭穿著其他保暖衫。

Ⅴ.  99%係空氣：航天材料

氣凝膠係一種有超強保暖性嘅物質，佢最初係喺1931年由美國國家宇航局研發，主要成分為二氧化矽嘅固態凝膠，其中99%係空氣。佢特別之處係保留羽絨嘅保暖程度，又唔會顯得個人好臃腫，甚至可以用嚟做褲，舒服又唔易變形。

因為氣凝膠內部充滿空氣，空隙大細都係納米級別，所以空氣好難穿透，從而產生好強嘅隔溫能力，用佢嚟做衫可以好好咁將體溫鎖住。

Ⅵ.  插電變暖：usb充電加熱衣服

冬天嘅時候你哋一定有諗過如果個暖爐可以隨身攜帶就好，呢件usb充電加熱衣服就可以滿足你呢個心願，佢嘅原理係通過碳纖維絲發熱，只要連上充電器充電，就好似全身裝上暖爐咁識發熱。碳纖維絲外包咗絕緣體，所以唔會有觸電或者燙傷嘅情況，仲可以用水洗添！而家科技進化真係令人大開眼界！