自動輔助≠無人駕駛

 

今時今日嘅汽車加上AI智慧，確是係聰明得多。車廠亦很致力研發無人駕駛技術，根據SAE（美國汽車工程師學會）嘅分類，自動駕駛可以分為L0-L5級六個階段。其中L0代表無自動輔助功能；L1-L2為駕駛輔助系統，主要由司機控制；L3-L4為有條件嘅自動駕駛系統；只有到咗L5先係真正無人駕駛。（詳細解說請看附圖）

 

咁即係話，除非級別去到L4或L5先唔需要司機接管駕駛，而家喺香港用緊嘅自動駕駛系統都只係去到L2，雖然技術上已可做到L3，但因為交通環境同道路設置有限制，所以唔可以真係用到L3。

自動駕駛幫到你

 

我哋先睇下一啲用家覺得自動駕駛點幫到手先：「平日開車，我剩係手握住軚盤，煞車和油門都唔使踩，系統會自動跟車，自動轉彎，非常方便。有時會心神恍惚一下，偏離咗少少車道，又或者無留意前車突然煞車，系統都會立即修正或煞慢，同時又會發出警告。」

自動駕駛又會害死人

 

呢個係L2自動駕駛嘅好處，但如果你太信任佢就隨時出事，最轟動嘅案例係2019年，一架Tesla Model 3喺Autopilot狀態下以110km/h嘅時速直插入一架正橫躺喺馬路嘅白色貨櫃車，原因係當時系統分辨唔到白色車。

其實，我們喺好多網上短片，都睇過有啲司機又放開手又玩手機，有啲更離譜到食住飯盒開車。有時會令到司機混淆咗「輔助」駕駛同「自動」駕駛嘅概念，有啲人太信任自動輔助駕駛系統，以為開車時完全可以解放雙手雙腳。

 

更有啲車主喺網上分享咗自以為好聰明嘅做法，比如將礦泉水樽、或者一個橙綁喺軚盤上迷惑系統，等系統誤認為係駕駛員嘅手放喺軚盤。甚至有車主上傳一段自己使用輔助駕駛系統瞓住開理想ONE嘅視頻，一度引發全網熱議。

 

自動駕駛嘅發明源自咁樣一個邏輯，人類揸車時會犯很多錯誤，而自動駕駛汽車犯錯嘅概率相對於人類要細好多，會令駕駛變得更加安全。點解原本係為咗令人類駕駛更安全嘅系統，有可能成為馬路殺手？呢個唔單單係一個技術問題，而係駕駛態度問題。

 

美國安全保險研究就喺2020年做過一項調查，有48％司機錯誤認為，只要開啟 「Autopilot」功能，唔握住軚盤都係安全嘅。其實咁做就係錯嘅。

連香港運輸署都提醒司機：輔助方向引導和輔助轉線功能只屬輔助駕駛功能，而非自主駕駛系統，因此司機需要時刻保持百分百警覺，並需以雙手控制車輛。

駕駛自動駕駛系統嘅正確態度

 

依照定義Level 2自動駕駛必須要符合：可以完全接管車輛，包含加速、煞車以及轉向，但駕駛必須要全程監控並隨時準備接手。咁點用L2駕駛自動系統先最安全好用？

 

1. 千萬記住呢個唔係無人駕駛系統

2. 要時常注意路面狀況

3. 系統可以幫助你舒緩一下專注駕駛而產生嘅疲勞，但唔好忽略系統發出嘅警號

4. 雙手唔好離開軚盤

5. 雖然系統可以自己調整車速，但右腳最好唔好離開腳踏，預備有需要時立即踩到煞車

6. 調校行車車距時，也要緊記「2秒原則」，方法係計算前車經個一個路標（例如燈柱） 後嘅2秒，自己架車剛好經過。

7. 當感到疲勞（有啲系統可以監察到司機狀況而發出疲勞駕駛警告），請停車休息一陣

8. 唔好將系統當係你嘅代駕，飲咗酒唔好揸車

9. 留意系統出錯（例子：假如路上有一個膠袋吹來，程式可能會因為錯誤偵測為行人作出規避。）有時系統會誤判而自動扭軚，請即時人手接管

10. 當你感覺前面有危險或跟車太貼，唔好等系統反應，主動減慢車速！