打風最緊要識得貼好膠紙

強風襲港，家居最脆弱嘅通常都係每個玻璃窗，所以，颱風嚟緊，一定要記得預先用膠紙貼好玻璃窗。

貼咗膠紙並唔代表玻璃不會破裂，而係要減緩玻璃俾強風吹爛後，唔會有碎片飛傷人。

咁點貼先至最有效？

由於玻璃中間位置最要承受變形同壓力，所以用米字型嘅貼法，貼到窗框之外就做到最強嘅支撐，能降低玻璃振動頻率。

咁用乜嘢膠紙最適合？

如果講韌性，就一定係用厚嘅牛皮膠紙，但風球過後要撕走就比較難清潔，而薄薄嘅紙質皺紋膠紙用完一撕就完，好易清走，但韌性較差，未必頂得住烈風。

所以，為咗安全著想，都係用有更好保障嘅牛皮膠紙，至於透明嘅封箱膠紙就最差，不但韌性不足，而且好難清潔。

用乜紙都好，都要記緊，颱風一過，就應盡快清去膠紙，因為愈遲清，愈容易留低膠迹。

停電自救法

 香港嘅供電確實係全亞洲數一數二穩定嘅，但最近都遇到大停電嘅意外，而颱風期間，無論機會幾低都好，都有機會造成停電意外，所以，我地不妨做好準備，當停電嘅時候，可以自救一下。

當然，自救嘅最好方法，就係喺屋企常備一台大容量嘅行動電源，而佢嘅設計要可以同時提供交流電（AC）同直流電（DC） 輸出，咁天氣熱嘅時候都可以吹下電風扇，座枱電腦都能夠喺停電期間用。小編建議要買嘅話，要挑選至少有450Wh以上電力嘅行動電源。其實買咗這種行動電源都唔會嘥，因為，如果你鍾意露營或車Camping，拎去郊外用就啱曬嘞。

水浸屋自救法

 喺橫風暴雨下，住係地下嘅朋友最驚就係水浸屋。所以，買定一個小型又夠強嘅抽水泵先可以自救。

買一個有250W電力嘅抽水泵，平均每分鐘能抽到約125升嘅小型抽水泵，可應付大部份嘅水浸屋情況，而一部抽水泵都只係500港元左右，值得放一部喺屋企傍身。

如果，傢俬真係不幸浸咗，最緊要喺水退後立即整乾，抽濕機同風筒係好辦法。如果係木傢俬就千祈唔好搬出屋外用猛太陽曬，啲木會好易爆裂，而布質或皮質傢俬就要做好防霉。

8號波返工三寶

打風最慘嘅係仲要返工嘅朋友，喺大風大雨嘅環境下，記得要穿戴好防風防水裝備，如果唔係搞到一身濕，開工唔舒服之餘，仲有機會凍親呢。

 

第一寶：防水靴唔少得

「百病從寒起，寒從腳底生」，好多人以為水浸街著拖鞋濕咗腳都無所謂，其實，咁做係好易傷身體嘅，雖然話夏天熱，但喺打風時間浸住腳行路，寒氣會由腳底生。所以，出街都應該著番對防水靴，保持雙腳乾爽係好重要嘅。

而有鞋廠更運用咗「黑科技」，除咗用防水透氣嘅物料做防水靴，更加入咗熱能保暖設備，用手機Apps調校雙腳保溫溫度，確保防水兼保持適當溫度。

第二寶：打風都打唔爛嘅 「颱風遮」

8號風球下，係咪擔遮都無用？其實，有設計師已研究出就算10號風球都吹唔反嘅「颱風遮」。呢把遮係由一位荷蘭人Gerwin Hoogendoorn設計，佢外型獨特，呈流線形，而實際上佢真係利用咗空氣動力學去設計，據講，一面長一面短，加上有好強嘅傘骨結構，配合氣流嘅物理原則，特別可以抵抗強風，就算10號風球下都保證唔反遮。

第三寶：防水又透氣嘅風褸

喺暴風下，大雨係打横咁吹，就算擔遮都會濕身，所以一件防水又透氣嘅風褸亦都係必需裝備。佢唔單止令身體保持乾爽，更能保持體溫，免得吹到感冒。

選擇風褸，其中一個要點係要選擇防水同透氣功能都強嘅面料，眾多面料中，GORE-TEX應係最好嘅選擇之一，就連消委會都大讚呢種面料確係防水、透氣都一流。

風褸面料一般分為最外面嘅保護層、中間嘅防水透氣層同裡層，好嘅面料均需具備防水透氣性，佢有一種合成高分子復合膜，分子間隙大於空氣而小於水分子，因此阻擋雨水嘅同時能夠將汗水排出。原則上嚟講，面料所搭載嘅科技專業程度越高，風褸性能就越好。

千祈唔好㨂透氣差嘅面料，因為汗水濕氣排得唔好，好容易成身濕曬，搞到好唔舒服。好具代表性嘅GORE-TEX，表層有數十億個微孔，微孔比水汽分子大好多倍，然後又比水分子細好多，出汗後蒸發嘅水氣能夠穿過薄膜排出，所以能夠做到防水、防風、透氣效果。