官方透露出嚟嘅新功能，較受注目嘅有圖像一撳褪地、鎖定畫面好似Apple Watch咁大玩個人化、更強大嘅專注模式、編輯甚至刪除啱啱發出嘅iMessage等等，其實仲有好多官方冇乜提及，但又非常有用嘅功能㗎！就由小編介紹一啲好好用但少人講嘅秘技俾大家，令你嘅iPhone好似私人秘書咁貼心。

 

 

1. 玩Apple Watch式隨顯螢幕

(圖片來源: 9to5mac)

 

第一個要介紹嘅秘技，其實已經曝晒光，但官方又真係一直冇講過iOS 16會有呢個功能，佢就係隨顯螢幕（Always on Display，簡稱AOD）。最初係由用家叉電過後無意發現，又或者自己整一個黑色牆紙再校暗亮度扮係AOD。不過iOS 16推出beta 4後，有外媒喺內部文件發現全新隨顯桌布的動態影片，清楚顯示iPhone 14進入待機狀態後，iOS 16 解鎖畫面桌布會立即出現過場動畫，進入AOD模式。當使用者放低手機，螢幕會變音，顏色亦變得單調，但當使用者拿起手機，螢幕會變番光亮，顏色亦回復正常，就好似Apple Watch果種效果。不過該段影片只見到iPhone畫面得時間日期，希望蘋果繼續改良，到正式版推出有埋Widget小工具就更理想。亦有傳AOD只限iPhone 14 Pro及iPhone 14 Pro Max用到，然後去到 iPhone 15甚至iPhone 16先開放全系列iPhone支援。

 

2. 叫Siri幫你熄手機

 

呢個係小編想要好耐嘅功能：喂Siri，幫我熄機！而家iPhone要熄機，就撳住左右邊掣三秒，然後要掃一下螢幕，除咗要等，仲要你兩隻手都要得閒。iOS 16 beta 4就可以叫Siri幫你熄手機，又或者你用完Facetime，叫Siri幫手收線。雖然熄機前，你仲要確認一次係唔係要熄機（小編估計係防止使用者被人整蠱攪到熄咗機都唔知），但起碼而家單手就做到，仲慳咗少少時間。而根據網上擷圖顯示，使用者想執行呢個功能，要先啟動Siri然後再揀啟動收線功能，如果你真係好驚被人玩，攪到成日意外熄機，咪唔好啟動呢個功能。

3. Chrome同Edge瀏覽器可以用Apple Pay

(圖片來源: SteveMoser@twitter)

 

而家喺iPhone用瀏覽器網上購物，如果你想用Apple Pay俾錢，就只能用蘋果自家嘅Safari，iOS 16似乎就解除咗呢個限制。自從iOS 16嘅第二、三個測試版推出後，有網民發現另一款瀏覽器—Firefox，都用到Apple Pay俾錢，然後7月尾iOS 16推出第四個測試版本，又有網民測試到其餘兩款熱門瀏覽器，即係Edge同Chrome都用到Apple Pay俾錢啦！有人就猜測Apple咁做，係為咗應付明年春季實施嘅歐盟數碼市場法（一條限制大型科技企業對小型企業進行反競爭行為嘅法案），避免因此受到歐盟懲罰。如果Chrome用到Apple Pay，咁大家唔駛再喺Safari又bookmark番同一樣嘅購物網店，都算係貼心嘅小改進。

 

 

4. 即時動態顯示外賣拎得未

 

講起購物，大家掃完貨之後，都好想知戰利品運到去邊、幾時到埗等等，可能你要頻頻去購物網站或者快遞app，睇吓送貨進度如何，而iOS新增即時動態功能，等你唔駛開其他app，就咁係鎖機畫面都知道件貨幾時送到嚟。不過呢個功能可以做到乜，就視乎第三方app嘅開發人員想點做，所以日前蘋果推出咗 ActivityKit 框架，俾開發人員可喺鎖定螢幕上，按照應用程式嘅更新，同步進行實時跟蹤，例如咖啡店可以「通知」你頭先外賣落單嘅咖啡已經做好，放喺櫃面等你拎、買衫買鞋網站可以話知你件貨而家由東莞運緊落黎，預計等多三日到香港等等。

 

 

5. 用iPhone遙控其他裝置

 

用另一部電腦控制第二部電腦就唔出奇，但你有冇試過用手機嚟控制電腦、甚至一部iPhone控制其他嘅iPhone？iOS 16 就喺輔助功能加入「控制周圍設備」選項，俾你喺藍芽接收到嘅距離內，控制另一部iPhone或者iPad。不過另一個裝置都需要使用iOS 16 (或 iPadOS 16)，同埋登入相同嘅Apple ID 帳號，最後係iPad唔可以控制iPhone，只能用iPhone控制iPad。至於可以遙控做到乜，暫時係用iPhone打開另一個裝置嘅主畫面、App切換、通知中心、控制中心同埋啟動Siri，至於可唔可以遙控開啟另一部裝置嘅檔案，又或者用手機控制另一部裝置執行某些功能(但可以執行及控制另一部裝置嘅音樂播放)，就暫時未見做到，小編希望呢個功能可以更完善，例如可以用iPhone控制iPad然後做presentation，或者用iPad畫完圖後用iPhone開啟俾其他人睇等等。

6. 秒速搵番wifi密碼然後儲存

(圖片來源: MacRumors)

 

假設你開舖頭，裝咗wifi方便員工上網，但你又唔想將wifi密碼貼出嚟以免被街外人睇到，可以點做呢？又或者朋友上你屋企，想借用你的wifi，但你好耐都冇入過密碼所以忘記咗，可以用咩方法去搵番個密碼出嚟？iOS 16可以俾你用Face ID、Touch ID或者Passcode，睇番你曾經有連過線嘅wifi密碼，然後俾你複製再分享俾其他人。方法係入咗wifi選項後，再喺密碼長撳，手機就會出現你想用Face ID、Touch ID或者Passcode睇番wifi密碼。用番舖頭、朋友上屋企做例子，你可以用呢個方法將wifi密碼透過whatsapp俾新員工或者朋友，咁咪唔驚被街外人知道wifi密碼啦。

 

 

7. 一次過用相同標準去執相

(圖片來源: 9to5mac)

 

以前你影咗好多相，要逐張相去執，非常嘥時間，尤其好多相片編輯，都只係校光暗、或者令主體sharp啲、甚至用自動執相功能令張相好睇一點，你一定會諗：可唔可以用同一堆準則，一次過執好多嘅相？iOS 16就容許你咁做，方法係首先揀一張，然後點擊右上角的Edit，編輯相片完後按Done。之後返去相薄，再選擇右上角的三線icon，再選copy edit，然後你可以揀邊啲相片要用同一套執相方法，揀完再選右下角的三畫圖示，然後揀Paste Edit，咁你頭先所揀既所有相都會執靚晒！

 

 

8. 所有筆記用Passcode或Face ID做密碼

 

如果你習慣將所有密碼，都用iPhone嘅筆記儲存，咁呢個iOS 16功能對你非常有用。因為你可以將每個notes都上鎖，但又唔駛每個notes都要獨立密碼，然後用Face ID、Touch ID或者Passcode幫所有notes上鎖。要解鎖睇番notes肉容，就要透過Face ID、Touch ID或者Passcode，除非你自爆Passcode，否則其他人都幾難睇到你上鎖咗嘅筆記寫乜東東。

9. 支援任天堂Switch Joy Con手掣

(圖片來源: Nintendo)

 

iPhone 14支援5G，又大有可能用A16晶片，加上螢幕顯示又超靚，唔用嚟打手遊實在浪費！如果你唔想篤手機螢幕篤到手痛，不如買任天堂嘅Switch Joy Con手掣，然後將佢哋同裝咗iOS 16嘅iPhone連接，打機都舒服得多。當iOS 16初初推出測試版，已經有外國網友發現，iOS 16係支援任天堂Switch 嘅Joy Con，而且配對方法超簡單，就咁用藍笌就可以，手機仲識得幫你配對一隻或者兩隻手掣，如果左右手掣都配對，仲可以變為一個大型控制器。根據台灣嘅遊戲迷，佢哋話iPhone 用iOS 16連接Switch Joy Con手掣，表現拍得上連接switch主機，實在係打機迷嘅喜訊。

 

10. 螢幕擷圖可以複製後自動刪除

 

最後一個隱藏功能，可以話係新鮮滾熱辣，因為係剛剛推出的iOS 16 beta 5先加入既新功能，喜歡擷圖然後向其他朋友分享消息嘅你，一定會覺得呢個功能超好用！而家我哋喺FB或者手機推送，見到突發消息，通常都係螢幕擷圖，然後再喺whatsapp或者FB貼圖，跟住再share出去。雖然係方便，但缺點係相片簿會愈儲愈多擷圖。iOS 16 beta 5新增「複製和刪除」功能，俾你擷圖後按copy，將圖片喺whatsapp或FB分享後，唔再留底喺相片庫，咁你就唔駛再入去圖片庫將佢地逐個刪除啦。

咁多種秘技，唔知你地又知道幾多個呢？