齊齊體驗超爽Dash Cart購物模式

 

Amazon新發明嘅Dash Cart會陸續應用喺美國Amazon Fresh超市中，而第一間用嘅係洛杉磯嘅Woodland Hills，不如我哋一齊去體驗下先。

 

Amazon Fresh係Amazon推出的新概念超市，喺店外睇感覺唔到有乜特別，但入到去就見到一部藍色嘅Alexa自助服務機，你只要對住部機講：「Alexa，我要搵Lurpak牛油 。」Alexa就會話你知牛油擺喺邊。又或者你喺屋企已用Alexa錄低購物清單，入到超市用Amazon App就可以逐樣嘢搵俾你去買。

 

當然，今次嘅主角係架Dash Cart，你問咗Alexa，就用手機喺Dash Cart掃一掃，將Amazon賬戶登入車中，就可以推去Shopping。Dash Cart個樣無乜特別，同香港超市用嘅手推車差唔多，關鍵係車內裝載大量嘅感應器同鏡頭，當我哋將要買嘅嘢掉入去，佢就會自動識別貨品細節、價錢，透過推車上嘅觸控屏顯示識別結果同計算埋推車內貨品嘅價錢總和。

由於推車也有磅重功能，只要放入計重量買嘅貨品，例如生果、蔬菜等，Dash Cart就自動計好幾重同幾錢。

 

我哋除咗隨時用推車Scan下件貨就知貨品詳細資料同做緊乜嘢優惠，仲可以透過手上鏡頭Scan入折扣券等優惠。

 

Dash Cart亦內置咗Alexa數碼助理服務，我哋可以一邊推車，一邊用聲控問Alexa想要嘅貨放喺邊，亦可以問下佢今日有乜嘢優惠添㗎。

因為爽，Dash Cart可能會令你買多咗嘢

 

當我哋搵齊要買嘅嘢。就可以推車走一條Dash Cart專用出口通道，車上嘅Sensor就會自動從我哋嘅Amazon帳戶俾錢，咁就完成交易，直接將貨品攞走，如果超市係連接停車場嘅，咁仲方便，直接推架Dash Cart去架車度，將買嘅嘢放入車上面就開車走人。

 

咁樣行超市確係好爽，又超級方便。唔怕因為「腦霧 」唔記得俾錢，又好似唔使錢Shopping咁，直接攞啲貨走。By The Way，Dash Cart仲可能係大頭蝦嘅救星，大家有無試過買嘢唔記得俾錢就走咗去？被保安捉到真係水洗都唔清，但有咗Dash Cart就無有怕嘞。不過，等手機收到賬單嘅時候，可能你會發覺自己唔經唔覺買多咗好多嘢添！呢個好有可能係Amazon Dash Cart嘅「隱藏陰謀 」，等你買得爽就買多咗嘢，生意自然多咗啦！

無人超市新趨勢

 

雖然香港仲未有Amazon嘅超市，但佢嘅「無人超市」概念，加埋超級方便又新穎嘅Dash Cart，確係未來超市嘅營運趨勢，香港總有一日會跟上呢個潮流嘅。