1. 天氣溫度高
其實手機喺任何情況下都有可能會導致過熱，不過係夏天，過熱嘅問題就會比較頻密發生，因為天氣嘅溫度再加上手機機器運作而產生嘅溫度，所以夏天手機溫度嘅上升速度一般會特別快。
2. 密集使用
當我哋經常用手機嘅時候，都有可能會導致手機機身嘅溫度上升，尤其是當我哋用於玩遊戲（尤其係圖形密集型嘅遊戲）、影相、拍片、或者長時間開住某啲應用程式，都會令到手機容易產生過熱嘅問題。長時間嘅工作或者開啟大量應用程式會令手機CUP加重處理負擔，從而產生大量熱能，當手機過熱嘅時候，就意味着手機內嘅處理器需要休息或者工作量已經超載。
3. 充電時
當手機係一個炎熱嘅環境中充電，手機都有可能會過熱。充電呢個動作本身都係要啟動手機嘅電源接駁，本來手機都會有微微嘅升溫，但當你係一個炎熱嘅環境下充電，就會令手機升溫變得快速，從而導致過熱。另外，用品質差嘅充電線，或者不兼容嘅充電線充電都會令手機過熱，因為每部手機都有特定嘅充電率輸出，用呢啲不兼容嘅充電線好容易會造成瓦數超出允許範圍而導致手機電量負荷太大。
4. 屏幕亮度最高
當你長時間將屏幕亮度調校去最高水平嘅時候，都會令你手機溫度上升。夏天每一日都好天朗氣清，去到中午時分太陽曬落電話嗰陣，有時候真係睇唔清任何嘢，我哋好自然會將個光度較到去最高，其實呢個做法係非常之耗電，當手機嘅電能輸出得咁快嘅時候，熱能亦都會隨之而升高，導致手機過熱。
1. 影響使用體驗
手機嘅溫度升高係會影響手機嘅性能，多數CPU需要處理好多嘅數據，同時溫度又好高嘅話，速度就會減慢，更可能會用用吓死機，影響使用手機嘅感覺同體驗。
2. 電池壽命減短
當手機內部嘅溫度升高，電池嘅鋰離子會逐漸消失，亦即係正正代表手機電池嘅壽命開始耗損，呢個時候你會發現手機無論係用定唔用嘅情況下，耗電量都會比之前快好多，縮短電池壽命。
3. 爆炸風險
當手機溫度去到一個高位嘅時候，手機內部嘅器件可能會燒壞，高溫亦都會令電池內鋰離子嘅釋出，從而產生輻射，雖然輻射出嚟嘅微量元素唔係太多，但長時間接收呢啲輻射都會對人體產生影響，溫度越高輻射亦都越大。如果同時一邊充電一邊用電話，更可能會引起爆炸，雖然而家手機充電可以做到充滿後自動切斷電源嘅功能，不過為咗安全至上，大家都係唔好一路充電一路用手機啦！
1. 除低電話殼
當你手機已經過熱嘅時候，你第一樣要做嘅嘢就係幫手機降溫，最直接嘅方法就係除低你嘅手機殼，我哋用手機好多時都會喺外面加多個手機殼去保護手機，呢個手機殼會阻礙到手機嘅散熱功能，當除低手機殼嘅時候，可以令手機有更多空間去散熱。
2. 減少使用手機
其次，可以嘗試減少使用手機，如果你喺到玩緊遊戲或者用緊某啲程式嘅時候，將程式關閉，等待手機降溫後再繼續。有好多時一啲程式開咗但自己係唔知道，呢個時候我哋可以試吓將手機暫時校去飛行模式，切斷一啲需要上網先至可以運行嘅程式，從而減低手機嘅運作率，亦都可以嘗試開啟手機嘅省電模式，減低手機CPU嘅負擔。
如果試咗省電模式同埋飛行模式都係未能迅速降溫，即係代表有一啲未知嘅程式開啟咗但係無法關閉，呢個時候可以嘗試關機，關機後嘅手機會切斷後台一切操作，呢個時候手機就會迅速降溫。
3. 避免戶外使用手機
因為手機係非常之怕熱，喺炎炎夏日最好就避免喺戶外使用手機，或者充電嘅時候唔好比陽光直接照射。喺戶外使用手機好多時都要將光度調校到去最高，導致耗電量大，手機又容易過熱，第二就係因為長時間喺太陽底下用手機，手機好容易會超出本身正常嘅溫度，所以用手機嘅時候盡量搵一啲有遮蓋嘅地方或者陰影底下，發現手機過熱嘅時候就應該暫停使用。
4.使用手機降溫神器
i.磁吸式手機降溫器
市面上有幾個唔同牌子嘅磁吸式手機降溫器，例如Momax Play 、小米、黑鯊、Vieruodis等等，功能都係大同小異，主要都係具備磁吸力，可以吸喺手機上（iPhone/Android手機均可），然後啟動製冷/吹風功能，從而令手機降溫。喺而家呢啲咁熱嘅天氣，經濟條件許可嘅話，買返個神器傍吓身都係一個唔錯嘅選擇。
ii.手機架遮陽罩
人要擔遮，有冇諗過手機都可以擔遮，有網站賣緊呢款具備風扇嘅遮陽罩，唔好睇佢個樣好似好搞笑咁，其實佢可以擋陽光兼具備降溫功能，喺天氣熱又要用手機拍嘢呢啲緊要關頭，分分鐘可以大派用場！
Tech實你 手機 過熱 中暑
