Alfred開過唔同類型嘅餐廳，而家主攻健康素食，佢係一個瘋狂嘅「煮飯公」，為咗跟米芝蓮星級嘅名廚學藝，毅然放低一切工作，專心學藝半年，所以有今天嘅成就。佢用焗爐或蒸爐做菜，可以講到咗得心應手嘅境界，所以小編就專誠請教Alfred點睇蒸焗爐、氣炸鍋同微波爐呢三種香港家庭最常用嘅煮食工具。
Alfred就用一隻芝麻豬仔包示範蒸焗爐、氣炸鍋同微波爐嘅優劣分別：
Alfred先講微波爐，佢只係做到將個包「叮熱」嘅效果，叮出嚟成個包熱辣辣軟淋淋，食落只係覺得個包熱咗同淋咗，無乜特別好食咗。
再用氣炸鍋去炸一炸個包，結果出來確係令我哋食咗一個脆皮豬仔包，包身變得有啲乾，似啱啱烘出來嘅多士。Alfred建議，用氣炸鍋翻熱軟豬仔包，可在包心夾一塊厚牛油去焗，咁可以令個包食落多啲Juicy感覺，出嚟嘅味道更香更滋味（但就更邪惡了）。
咁芝麻豬仔包遇著蒸焗爐又係會點？Alfred就用「神奇還原」來形容。佢用咗蒸焗混合模式去翻熱，濕度50% / 180 ℃熱風加6分鐘嘅組合，做焗出來嘅效果，竟好似啱出爐嘅面包感覺，重新引發出面包嘅香味，食落好似出爐面包咁熱辣辣，麵包皮帶脆，包身軟熟，而它嘅軟熟感絕不似微波爐嗰種好翻叮嘅感覺，而係好接近新鮮出爐嘅質感。
星廚Alfred只係用咗咁簡單嘅「芝麻豬仔包測試法」就講出三種煮食工具嘅優劣。唔通真係要掉走氣炸鍋？
Alfred嘅意見係，買咗就放喺度繼續用啦。因為佢的確喺炸嘢或焗嘢方面，比用焗爐或蒸焗爐更方便快趣，第一唔使預熱，好快就去到預設溫度，第二用完清洗容易，而家超市好多專俾氣炸鍋用嘅急凍食品，跟住指引做就食到好味炸物。所以氣炸鍋仍算係「懶人專用焗爐」。
不過，Alfred加多一句話，氣炸鍋可以用嚟焗食物嘅空間實在太少，如果你想食一個急凍意大利薄餅，你係要將佢分成四份，逐份攞入鍋中焗，焗到令人氣餒。又如果你屋企經常有超過兩個人開餐，氣炸鍋連一隻雞都放唔到入去焗，真係嬲到想即刻掉咗佢。
其實，而家便利店、公司Pantry都有微波爐嘅存在價值，似乎家中廚房漸漸無咗佢嘅地位。Alfred從來唔用微波爐烹調食物，以前都用佢嚟叮番熱隔夜餸食，又或者係食杯面用嚟叮，確保面夠熱，又或者急住要解凍食材都會用吓，但而家連呢啲都唔用微波爐了，因為蒸焗爐有更能保留原味嘅蒸氣翻熱功能。
所以，Alfred建議未買微波爐嘅話真係唔使考慮，買咗嘅都送俾啲屋企唔開爐剩係想食翻叮食物嘅朋友吧。
蒸焗爐其中一個優點係比一般對流式焗爐煮食速度快，有啲甚至快過微波爐。而蒸氣能夠令食物恢復原本嘅水分，因此剩菜翻熱後食落亦像新鮮出爐時美味。蒸焗爐不但可以令食物快速熟透，唔破壞食物營養又有更好嘅味道同口感。
蒸焗爐仲有一個非常大嘅好處係，可以有大細Size㨂，唔會好似氣炸鍋咁局限，而且內置多種煮食功能，如煮、烤、烘焙、焗、蒸、解凍及翻熱一機多用，最啱小蝸居。
由於蒸焗爐結合電蒸鍋同焗爐嘅原理，所以它擁有焗爐唔加油嘅特色，亦有電蒸鍋保留食物原味及營養嘅優點。蒸焗爐比焗爐更健康，用佢嘅蒸氣煮食，煮食時食物質感、顏色、香氣、維他命同礦物質都會得到最佳保存，既健康又原汁原味。你甚至可以同時蒸魚、煮餸、煲飯，一次過煮好成餐飯。
睇完Alfred嘅意見，大家都想買一個蒸焗爐？咁應該點㨂呢？Alfred只有一個建議，就係買一個功能最先進嘅型號，而且盡量有咁大買咁大，咁可以一次過做幾味菜。
Alfred更補充，而家蒸焗爐已發展到5.0時代了，而4.0時代同5.0 時代都值得買，咁乜嘢係4.0，乜嘢係5.0呢？
好多主流嘅蒸烤箱就係4.0，佢嘅特點係係蒸汽方面，高溫蒸汽直噴取代蒸發盤蒸發，將水箱嘅水引至蒸汽機後利用高溫將水煮沸，產生嘅水蒸氣直接噴射到爐中，優點係蒸汽量可控且蒸汽相對乾淨，防止烹飪過程中產生嘅冷凝水流回到蒸盤再次蒸發，容易形成污染、搶味等問題。
4.0蒸焗爐喺烤焗方面加入背部發熱管，上發熱管演變成更科學嘅「M」型發熱管，形成上、背2組發熱管，配合背部熱風，令爐內溫度、濕度更加均勻。烘焙能力更強，焗乜嘢蛋糕都得。而4.0嘅不足之處係蒸汽噴射速度慢，底部熱力不足，難以上色。
嚟到5.0，佢就更加專業，適合好似Alfred呢類善煮嘅大廚，蒸烤箱5.0時代，喺4.0嘅基礎上突破，令蒸烤箱變得更專業，佢新增下外露式發熱管，上下發熱管獨立控溫，利用上下傳感器分別對爐內上下溫度進行分區控制，可以根據食材特性隨意調整，Alfred話精準嘅溫度調節對專業烘焙、烹飪至關重要，真係只有強者先會注重細節。5.0用嘅係多維直噴蒸汽，多孔同時噴蒸汽，爐內蒸汽濃度提升迅速，而且更均勻。
喺烤焗功能上，5.0係用3D循環熱風，增加對流功能，等蒸汽同熱量流動更有序。5.0可以話整體有顯著提升，適合追求烹飪且對烹飪要求高嘅家庭。價格比4.0當然貴，但係比4.0更專業，可以烹飪嘅菜式又多好多。
Tech實你 微波爐 氣炸鍋 蒸焗爐 名廚
